ოქროს ფოთოლმა აღდგენილი ჩაის პლანტაციიდან წელს პირველი მოსავალი მიიღო
კომპანია „ოქროს ფოთოლმა“ აღდგენილი ჩაის პლანტაციიდან წელს პირველი მოსავალი მიიღო.
პლანტაცია, რომელიც ხონის რაიონში დაახლოებით 25 ჰექტარ ტერიტორიაზეა გაშენებული ჩაის რეაბილიტაციის პროექტის ფარგლებში აღდგა. მოსავლის რაოდენობა წელს მინიმალურია - მოკრეფილი ფოთლის ჯამური ოდენობა 25 ტონას არ აღემატება, თუმცა კომპანიის წარმომადგენლების განმარტებით, მომავალი წლებისთვის ჩაის პლანტაცია უფრო გაჯანსაღდება და შესაბამისად მოცულობები უფრო გაიზრდება. ადგილზე მოწყობილია მცირე საწარმოც, სადაც ნედლი ფოთლის გადამუშავება ხდება. კომპანიის გათვლებით 25 ტონა მოსავლიდან საშუალოდ 7 ტონა მზა პროდუქციის მიღებას შეძლებენ.
"საწარმო ავაშენეთ აღვჭურვეთ დანადგარებით და ვცდილობთ განვითარება არ შევწყვიტოთ. ჯერ რა თქმა უნდა ყველანაირი ტექნიკა შეძენილი არ არის, თუმცა ალბათ უახლოეს პერიოდში საწარმოო ხაზების უფრო გათანამედროვებას და გაფართოვებას შევძლებთ. ყველაფერი ფინანსებზეა დამოკიდებული და ამ კომპონენტში სახელმწიფოს იმედი გვაქვს", - აცხადებს კომპანია „ოქროს ფოთოლის“ დირექტორი, ირაკლი ცერცვაძე.
კომპანია მიწების საბაზრო ფასად პრივატიზების პროგრამაში ჩართვასაც გეგმავს. მეწარმე განმარტავს, რომ მთავრობის მხრიდან პროგრამის შესახებ მეტი დეტალის გაჟღერების შემდეგ პრივატიზების პროცესში ჩაერთვებიან. მისივე მტკიცებით, საკუთრებაში არსებული მიწა მათ საშუალებას მისცემს საბანკო სესხებით ისარგებლონ და მეურნეობა გააფართოვონ.
შეგახსენებთ გიორგი გახარიას განცხადებით მეწარმეები, რომლებიც, წლების განმავლობაში საიჯარო პირობებს სახელმწიფოს წინაშე, პირნათლად ასრულებდნენ მიწების შეძენას პირდაპირი მიყიდვის ფორმით საბაზრო ფასად შეძლებენ.
