"ნაგომრის აგროსახლმა" ოზურგეთში 2,5 ჰექტარზე მოცვის ბაღი გააშენა

სახელმწიფო პროგრამების მხარდაჭერით, სასოფლო-სამეურნეო კოოპერატივმა „ნაგომრის აგროსახლი“, რომელიც 5 წევრს აერთიანებს, ოზურგეთის მუნიციპალიტეტის სოფელ ნაგომარში 2,5 ჰექტარზე მოცვის ბაღი გააშენა. 

ახალი პლანტაციის გაშენებისათვის,  ინვესტიციამ 150,000 ლარზე მეტი შეადგინა, მათ შორის, 100,000 ლარზე მეტი შეღავათიანი აგროკრედიტია, ხოლო 35,000 ლარი პროგრამის „დანერგე მომავალი“ ფარგლებში მიღებული თანადაფინანსება.  

„კენკროვანი კულტურები და, კერძოდ კი, ლურჯი მოცვი, ბოლო პერიოდში ძალიან პოპულარულია და აქტიურად გადის ექსპორტზე. გასულ წელს, მეხილეობის მიმართულებამ მნიშვნელოვანი როლი შეასრულა საქართველოდან ექსპორტის ზრდაში. ლურჯი მოცვის ექსპორტის მაჩვენებელმა სამ მილიონ დოლარზე მეტი შეადგინა. ეს იქნება ყოველწლიურად მზარდი რიცხვი, იმ ფაქტის გათვალისწინებით, რომ სულ უფრო მეტი ახალი პლანტაცია შედის მსხომიარობაში“, - განაცხადა ლევან დავითაშვილმა კოოპერატივის დათვალიერებისას.

მოცვის ბაღში, სეზონურად, 30 ადგილობრივია დასაქმებული, პროდუქციის რეალიზება როგორც ადგილობრივ, ასევე საექსპორტო ბაზარზე იგეგმება.

სახელმწიფო მხარდამჭერი ღონისძიებები სოფლის მეურნეობის დარგის განვითარების ხელშეწყობაზეა გათვლილი, რაც ფერმერებს საშუალებას აძლევს კონკურენტუნარიანი პროდუქცია აწარმოონ. 

პროგრამის „დანერგე მომავალი“ ფარგლებში, გურიის რეგიონში, 450 ჰექტრამდე ფართობზე ახალი ბაღია გაშენებული, მათ შორის, 276 ჰექტარზე მოცვის პლანტაციებია.  სოფლის განვითარების სააგენტოს  თანადაფინანსება, ჯამში, 6  მლნ ლარს აღემატება.