მოსავლის დასაზღვევად მიწის ფართობის ზომა გაიზარდა

გაიზარდა მიწის ნაკვეთის ფართობის ზომის ოდენობა, სადაც მოსავლის დაზღვევაა შესაძლებელი. მთავრობის გადაწყვეტილებით ცვლილება აგროდაზღვევის პროგრამაში განხორციელდა. 

დასაზღვევი სასოფლო-სამეურნეო მიწის ნაკვეთის ოდენობა 5 ჰა-დან 10 ჰა-მდე იზრდება, მარცვლეული კულტურების შემთხვევაში კი, 30 ჰა-დან 50 ჰა-მდე. 

გარემოს დაცვისა და სოფლის მეურნეობის სამინისტროს ინფორმაციით, აგროდაზღვევის პროგრამის ფარგლებში, ყველა კულტურაზე, ვაზის გარდა, სახელმწიფოს მხრიდან თანამონაწილეობა ისევ 70%-ია, ხოლო ვაზზე 50%.  სადაზღვევო პოლისი ფარავს შემდეგ სადაზღვევო რისკებს: სეტყვა, წყალდიდობა, ქარიშხალი, საშემოდგომო ყინვა.

სახელმწიფო აგროდაზღვევის პროგრამა 2014 წლიდან ამოქმედდა. უწყების ცნობით, სახელმწიფო პროგრამის  ფარგლებში, 2014 წლიდან  2021 წლის 31 დეკემბრის მდგომარეობით,  გაცემულია 136 ათასზე მეტი პოლისი, დაზღვეულია 123 ათას ჰექტარზე მეტი მიწის ფართობი, სულ სადაზღვევო პრემიამ შეადგინა 85.5 მლნ. ლარი, საიდანაც სახელმწიფოს თანადაფინანსება 57.7 მლნ. ლარია.  სახელმწიფოს მიერ გადახდილ 100 ლარ სადაზღვევო პრემიის თანადაფინანსებაზე 113.8 ლარი სადაზღვევო ანაზღაურება მოდის.