მინისტრი: საქართველო კაკლოვანი კულტურების მნიშვნელოვანი ექსპორტიორი უნდა გახდეს
საქართველო კაკლოვანი კულტურების ერთ-ერთ მნიშვნელოვან ექსპორტიორად ქცევას ცდილობს. გარემოს დაცვისა და სოფლის მეურნეობის მინისტრმა ამ მიზნის შესახებ მარტყოფში კაკლის გადამმუშავებელი თანამედროვე სტანდარტების საწარმოს დათვალიერებისას ისაუბრა.
"ჩვენ გვაქვს საკმაოდ ამბიციური, გრძელვადიანი მიზნები და ამოცანები, რომ საქართველო კაკლოვანი კულტურების ერთ-ერთი მნიშვნელოვანი ექსპორტიორი გახდეს მსოფლიოში", - განაცხადა ლევან დავითაშვილმა.
მისი თქმით, სახელმწიფოს პოლიტიკა, რომელიც ქვეყანაში მრავალწლოვანი კულტურების, მათ შორის, კაკლოვანი კულტურების განვითარებას ითვალისწინებს, პირველ შედეგებს უკვე იძლევა.
"იზრდება პირველადი წარმოება, რაშიც სახელმწიფო მნიშვნელოვან საგრანტო რესურსებს დებს და, შედეგად, პროგრამის ,,დანერგე მომავალი“ ფარგლებში, უკვე რამდენიმე ათასი ჰექტარი კაკლისა და ნუშის ბაღი გაშენდა; ასევე, ვითარდება მიწოდების მთლიანი ჯაჭვის შემადგენელი რგოლები.
სახელმწიფოს მხარდაჭერით იქმნება თანამედროვე სტანდარტების გადამმუშავებელი საწარმოები, რაც უმნიშვნელოვანესია ხარისხიანი, თანამედროვე სტანდარტის პროდუქტის მისაღებად, რომელიც არა მხოლოდ შიდა ბაზარზე იმპორტის ჩანაცვლებაზე იქნება ორიენტირებული, არამედ კონკურენტუნარიანი იქნება საერთაშორისო ბაზრებზეც“, - აღნიშნა ლევან დავითაშვილმა.
