გიორგი ხანიშვილი: პურზე დამატებით ფასების ზრდა მოსალოდნელი არ არის
ხორბალი მსოფლიო ბაზარზე იაფდება და პურზე დამატებით ფასების ზრდა მოსალოდნელი არ არის, - ამის შესახებ გარემოს დაცვისა და სოფლის მეურნეობის მინისტრის მოადგილემ განაცხადა.
უწყების ცნობით, მსოფლიო ბაზარზე 1 ტონა ხორბლის ფასი 234 დოლარამდეა შემცირებული და კლების ტენდენცია კვლავ გრძელდება. გარდა ამისა, აქტიურად გრძელდება მოსავლის აღება საქართველოშიც. სპეციალისტების ვარაუდით, ხორბლის საპროგნოზო მაჩვენებელი მიმდინარე წელს 150 ათასი ტონაა. რაც შეეხება ქერს, ამ შემთხვევაში მოსავალი 70 000 ტონას აღწევს.
"ქერის მოსავალი უკვე დაბინავებული გვაქვს. ვფიქრობთ, წელს ხორბლის მოსავლის რაოდენობაც მეტი იქნება. ჩვენ ვვარაუდობთ, რომ დაახლოებით 150 ათასი ტონა ხორბლის მოსავალი გვექნება. ერთი რამ შემიძლია თამამად ვთქვა, რომ წელს ხორბლისა და ქერის მოსავალი იქნება გაცილებით მაღალი ხარისხის, ვიდრე ეს წინა წლებში იყო", - აღნიშნა გიორგი ხანიშვილმა.
შეგახსენებთ უკანასკნელ დღეებში პური 10-15 თეთრით უკვე გაძვირდა. პურის მცხობელთა ასოციაციის ცნობით, მიზეზი ფქვილის სუბსიდირების პროგრამის ამოწურვაა.
