გიორგი ხანიშვილი: იმერეთის აგროზონის პროექტირებაზე უკვე ₾2.5 მლნ-ია დახარჯული
„იმერეთის აგროზონამ“ სასათბურე მეურნეობების კლასტერის განვითარების პროექტში მონაწილეობის მისაღებად ინტერესეთა გამოხატვა გამოაცხადა.
სოფლის მეურნეობის მინისტრის მოადგილის ინფორმაციით, აგროზონის პროექტირებაზე უკვე 2.5 მლნ ლარია დახარჯული.
„ეს არის პროექტი, რომელიც წყალტუბოს რაიონში მნიშვნელოვანი კლასტერის განვითარებას უზრუნველყოფს. იმერეთის აგროზონამ შეძლო და საქართველში განახორციელა უნიკალური საპროექტო სამუშაოები. ჩვენ მსოფლიოს ყველა საფინანსო ინსტიტუტთან გვქონდა უკვე კომუნიკაცია იმისთვის, რომ მაქსიმალური ინტერესი იყოს გამოხატული დასავლეთ საქართველოში მწვანილის კლასტერის განვითარებაზე. ეს არის კლასტერი, რომელიც იქნება უნიკალური თავისი სასათბურე კომპლექსით. ის საშუალებას მისცემს როგორც ქართველ ისე უცხოელ ინვესტორებს, რომლებიც მწვანილის ან სხვა სასათბურე კულტურის წარმოებით არიან დაინტერსებული შემოვიდნენ და ინვესტიცია განახორციელონ,“ - განაცხადა გიორგი ხანიშვილმა.
მისივე განმარტებით, იმერეთის აგროზონაში წარმოებული პროდუქტი მსოფლიოს ბაზრებზე ქუთაისის აეროპორტის საშუალებით გავა.
„ეს საშუალებას მოგვცემს უმოკლეს ვადებში ხარისხიანი ახალი პროდუქცია მივაწოდოთ მსოფლიო ბაზრებს. ეს არის პირველი სუპერ თანამედროვე შეთავაზება მსოფლიოს ინვესტორებისთვის. ეს კლასტერი იქნება საფუძველი რომ დავიპყროთ ნებისმიერი ქვეყნის ბაზარი,“- განაცხადა გიორგი ხანიშვილმა.
