განახლებული ფერმერთა სათათბიროს პრეზენტაცია გაიმართა
17 იანვარს, სასტუმრო „რუმსის“ გარდენ ჰოლში, საქართველოს ფერმერთა ასოციაციის ორგანიზებით, მისი მთავარი საკონსულტაციო ორგანოს - ფერმერთა სათათბიროს რეორგანიზაციის საპრეზენტაციო ღონისძიება გაიმართა. შეხვედრას სათათბიროს წევრი 20-ზე მეტი სოფლის მეურნეობის სექტორული ასოციაციის, მთავრობის, კერძო სექტორისა და საერთაშორისო ორგანიზაციების წარმომადგენლები დაესწრნენ.
ფერმერთა სათათბირო, მისი წევრი სექტორული ასოციაციების გამოცდილებისა და ცოდნის გაერთიანებით, შესაძლებლობას შექმნის ერთობლივად მოხდეს აგრარულ სექტორში არსებული პრობლემების დროული იდენტიფიცირება და მათი გადაჭრის გზებზე აქტიური მუშაობა. ასევე, სათათბიროს ჩართულობით დარგობრივ ასოციაციებს შესაძლებლობა ექნებათ რეგულარულად ჩაერთონ მიმდინარე საკანონმდებლო პროცესებში და ოპერატიულად ითანამშრომლონ როგორც ერთმანეთთან, ასევე სახელმწიფო სტრუქტურებთან, კერძო სექტორთან და საერთაშორისო ორგანიზაციებთან.
ახალი სამოქმედო გეგმით გათვალისწინებული ღონისძიებები ფერმერთა ასოციაციის მთავარ საკონსულტაციო ორგანოს თვისებრივად ახალ ეტაპზე გადაიყვანს, რაც მნიშვნელოვანია როგორც ფერმერების, ასევე, ზოგადად აგროსექტორის განვითარებისთვის.
საქართველოს ფერმერთა ასოციაციამ ფერმერთა სათათბირო 2017 წელს, მის წევრ ფერმერთა კენჭისყრის საფუძველზე დააფუძნა. ფერმერთა სათათბიროს მიზნებია: ფერმერთა ინტერესების დაცვა, მათი პრობლემატიკის განსაზღვრა, შესაძლო ალტერნატივების და/ან გადაჭრის გზების მოძიება და შესაბამისი სამოქმედო გეგმის შემუშავება; ასევე, მიმდინარე საკანონმდებლო პროცესებში დარგობრივი/სექტორული ასოციაციებისა და ფერმერების აქტიური ჩართულობის უზრუნველყოფა.
