ფქვილზე სახელმწიფო სუბსიდიის მოცულობა იზრდება

პურის გაძვირების შესაჩერებლად, მთავრობას, დამატებითი ფინანსური რესურსის გამოძებნა მოუწევს. დღეს მიღებული გადაწყვეტილების საფუძველზე ცნობილი გახდა, რომ 1 ტომარა ფქვილზე სახელმწიფო სუბსიდია 10 ლარიდან 15 ლარამდე იზრდება.

"პროგრამაში თავიდანვე ჩადებული იყო რისკები, რომ მაგალითად, რუსეთს 15 თებერვლიდან შემოაქვს კვოტირება, ასევე სავალუტო რისკი, ელექტროენერგიის გაძვირების რისკი. 2-2 მილიონი ლარი განაწილდა პროგრამის პირველ ორ თვეზე, მაგრამ ამ რისკებმა იმუშავა და ახლა ხორბალი სერიოზულად გაძვირებულია. თუ სუბსიდიის ამოქმედებისას 1 ტომარა პირველი ხარისხის ფქვილი 63 ლარი ღირდა, დღეს მისი ფასი 68 ლარს შეადგენს. შესაბამისად, 10 -ლარიანი სუბსიდია, რომელიც პირველ 2 თვეზე იყო გათვლილი, ახლა უკვე საკმარისი აღარ არის“ - განაცხადა სოფლის მეურნეობის მინისტრმა ლევან დავითაშვილმა.

შეგახსენებთ, რომ პურის გაძვირების შესაჩერებლად, სახელმწიფო პირველი ხარისხის ფქვილს ასუბსიდირებს, რისთვისაც ჯამში 10 მლნ ლარი გამოიყო. გაიზრდება თუ არა სუბსიდიის მთლიანი თანხის მოცულობა ამ ეტაპზე უცნობია. 

სუბსიდირების პროგრამის ფარგლებში ჩატარებულ პირველ ტენდერში 8 წისქვილ-კომბინატმა გაიმარჯვა, რომელიც 52 პურის ქარხანას 1 ტომარა პირველი ხარისხის ფქვილს ფიქსირებულ, 53 ლარად აწვდის.

პროგრამა 1-ელ დეკემბერს დაიწყო და 4 თვის განმავლობაში გაგრძელდება.