4100-მა მევენახემ რთველზე ₾45 მლნ-ის შემოსავალი მიიღო

კახეთში ამ დროისთვის 47 000 ტონამდე ყურძენია გადამუშავებული, ეს 6-ჯერ მეტია, ვიდრე 2020 წლის ანალოგიურ პერიოდში. 

ღვინის ეროვნული სააგენტოს მონაცემებით, რთველი 2021-ის ფარგლებში მოსავალი ღვინის საწარმოებს 4 100-ზე მეტმა მევენახემ ჩააბარა და 45 მლნ ლარის შემოსავალი მიიღო.

სააგენტოში განმარტავენ, რომ კახეთში დასეტყვილი ყურძნის დაბინავდება დღეს დასრულდება. 26 აგვისტოს შემდეგ გადამუშავებულია 15 000 ტონამდე ნასეტყვი ყურძენი.

კონდიციური ყურძნის მოსავლის დაბინავება კახეთში ტრადიციულად დედოფლისწყაროსა და სიღნაღიდან დაიწყო, მიმდინარე კვირიდან კი რეგიონის სხვა მუნიციპალიტეტებში აქტიურად გაგრძელდება.

26 აგვისტოს, ძლიერმა სეტყვამ და ქარმა, გურჯაანის, თელავისა და ყვარლის მუნიციპალიტეტებში, 4600 ჰა ფართობის ვენახები დააზიანა. 2 სექტემბერს სეტყვამ კი ყვარელსა და თელავში 180 ჰა ფართობის ვენახები დააზიანა.

მთავრობის გადაწყვეტილებით, მევენახები, რომლებსაც სეტყვამ 100%-ით გაუნადგურა მოსავალი ერთჯერადი კომპენსაციის სახით თითოეულ 1 ჰექტარ ფართობზე 3000 ლარს მიიღებენ.

სეტყვის შედეგად დაზიანებულ ყურძენს მევენახეები 1 კგ რქაწითელს 0,80 ლარად და 1 კგ საფერავს - 1 ლარად აბარებენ. მიმდინარეობს სეტყვისგან დაზარალებული აგროდაზღვევის სახელმწიფო პროგრამის ბენეფიციარების ზარალის დათვლა.