თბილისში უკანონოდ მითვისებულ მიწაზე აშენებული შენობები დემონტაჟს დაექვემდებარება
თბილისში უკანონოდ მითვისებულ მიწის ნაკვეთებზე აშენებული შენობები დემონტაჟს დაექვემდებარება.
თბილისის მერმა მუნიციპალური ინსპექციის ხელმძღვანელს, ლევან ჯღარკავას ასეთი შენობების დროული დემონტაჟი დაავალა.
კახა კალაძის თქმით, დედაქალაქში მსგავსი ფაქტები გახშირდა, რასაც მუნიციპალიტეტის მხრიდან რეაგირება მოყვება.
„მუნიციპალური და სახელმწიფო მიწების უკანონოდ დატაცება კატეგორიულად მიუღებელია. ამას არ დავუშვებთ. მსგავსმა ფაქტებმა სისტემატური სახე მიიღო და უკვე ბევრი შემთხვევა გვაქვს. რამდენიმე კონკრეტულ მიწის ნაკვეთზე გაფრთხილება მოსახლეობამ მიიღო, მაგრამ თუ თავად იმ პატარა შენობა-ნაგებობების დემონტაჟს არ განახორციელებენ, დემონტაჟს მუნიციპალური ინსპექცია გააკეთებს“, - განაცხადა კახა კალაძემ.
პროცესში თბილისის მუნიციპალურ ინსპექციას შინაგან საქმეთა სამინისტროც დაეხმარება.
„კატეგორიულად მიუღებელია სახელმწიფო და მუნიციპალური საკუთრების უკანონოდ მითვისება. ეს არც ჩემია, არც თქვენი. ეს სახელმწიფოს საკუთრებაა და არავის უნდა მივცეთ იმის უფლება და შესაძლებლობა, რომ ეს ყველაფერი მიიტაცოს“, - აღნიშნა თბილისის მერმა.
