თბილისში საყოფაცხოვრებო ნარჩენებს ღამის საათებში გაიტანენ

თბილისის მასშტაბით საყოფაცხოვრებო ნარჩენებს დღის საათებში აღარ გაიტანენ. ამისთვის გამოყოფილია სპეციალური დრო- 22:00 საათიდან 06:00 საათამდე. 

როგორც თბილისის მერმა კახა კალაძემ განაცხადა, ეს პროექტი საპილოტედ მხოლოდ ცენტრალურ უბნებში განხორციელდა და საკმაოდ წარმატებითაც. 

“გვინდა, ამ პროექტის განხორციელება მთელი ქალაქის მასშტაბით დავიწყოთ. “თბილსერვის ჯგუფი“ უკვე მთლიანად მომზადებულია,ავტომობილები ყველანაირად გადაწყობილია ახალი სისტემისთვის“,- აღნიშნა კახა კალაძემ. 

თუმცა, მისი თქმით, არის ისეთი ქუჩები, რომლებიც დღის განმავლობაში საჭიროებენ საყოფაცხოვრებო ნარჩენების გატანას. შესაბამისად, აქაც ისეთი დროებია შერჩეული, რომ პიკის საათებს არ დაემთხვას. ასეთი ქუჩებიდან ნარჩენებს 10:30 საათიდან 05:00 საათიან პერიოდში გაიტანენ. 

კახა კალაძის ინფორმაციით, დაახლოებით 100 ერთეული სპეცტექნიკაა ამისთვის მობილიზებული.