თბილისში ავარიული სახლების ჩანაცვლების პროექტს "ბიქეი კონსთრაქშენი" განახორციელებს

პირველი ავარიული კორპუსის საპილოტე პროექტის სადემონტაჟო-სამშენებლო სამუშაოებთან დაკავშირებით სატენდერო პროცედურა დასრულდა.

თბილისის მერის კახა კალაძის განცხადებით, ტენდერში შპს "ბი ქეი ქონსთრაქშენმა" გაიმარჯვა. კორპუსის დემონტაჟი კი, მიმდინარე წლის ოქტომბერში დაიწყება. 

"ტენდერში მონაწილეობდა ორი პრეტენდენტი და ვაჭრობის შედეგად ფასმა დაიკლო 260 ათასი ლარით. ვაჭრობაში მინიმალური ფასი დააფიქსირა - შპს "ბი ქეი ქონსთრაქშენმა“  და ის არის გამარჯვებული.  გამოცხადებული ფასი იყო - 6,480,330.00 ლარი.  შემოთავაზებული ფასია - 6,199,330.00 ლარი.

სამგორის რაიონში მდებარე მეოთხე კატეგორიის ავარიულობის მქონე შენობა იქნება პროგრამის პირველი მონაწილე, რომლის დემონტაჟი დაიწყება მიმდინარე წლის ოქტომბერში. სამშენებლო სამუშაოები მომდევნო ორი წლის განმავლობაში გაგრძელდება. პროექტის ფარგლებში, უნდა დაკმაყოფილდეს 36 ოჯახი, რომელიც მუნიციპალიტეტს უკვე გაყვანილი ჰყავს ქირით", -   განაცხადა კახა კალაძემ.  

მისივე თქმით, დედაქალაქის მერია აღნიშნული საპილოტე პროგრამით დამატებით 12 ავარიული კორპუსის პროექტს ამუშავებს.

"გამგეობები მოლაპარაკებებს აწარმოებენ კიდევ ათეულობით კორპუსის მოსახლეობასთან. მინდა მოსახლეობას თხოვნით მივმართო - თქვენი მხარდაჭერა, ჩართულობა ძალიან მნიშვნელოვანია ამ პროექტის განხორციელებაში. სამწუხაროდ, ხშირია შემთხვევა, რომ მოლაპარაკებების პროცესში ადგილობრივების მხრიდან უფრო მეტი ფართის მოთხოვნა ხდება, რაც ფიზიკურად შეუძლებელია. ჩვენ მზად ვართ, ერთი ერთში მოგცეთ ის ფართი, რასაც ფლობთ და ერთ სანტიმეტრს არ დაკარგავთ. რაც მთავარია, სრულიად ახალ, გარემონტებულ ბინებში შეხვალთ. ითანამშრომლეთ ჩვენთან, რადგან ეს ყველაფერი თქვენი ნორმალურ პირობებში ცხოვრებისთვისა და უსაფრთხოებისთვის კეთდება. რომ არა ეს პრობლემა, რაც მოლაპარაკებების პროცესში გაჩნდა, რომ ადამიანები იმაზე მეტ ფართს ითხოვენ, ვიდრე აქვთ, ერთი საპილოტე კი არა, 10 პროექტი გვექნებოდა უკვე მზად.

ასე რომ, მიმდინარე წელი იყო საკმაოდ მნიშვნელოვანი მოსამზადებელი სამუშაოებისთვის. გაძლევთ პირობას, რომ მომდევნო წლებში საკმაოდ დიდი მასშტაბი ექნება ავარიული სახლების ჩანაცვლების პროგრამას და მის ფარგლებში მუნიციპალიტეტი დედაქალაქში არაერთ ავარიულ კორპუსს ჩაანაცვლებს. 

ასევე, ხაზი უნდა გავუსვა იმას, რომ მთლიანი სამშენებლო ღირებულებიდან ნამატი ფართებით გასტუმრებული იქნება 5 407 987 ლარი, ხოლო მუნიციპალიტეტის ბიუჯეტიდან ასანაზღაურებელია 791 343 ლარი", - აღნიშნა კახა კალაძემ.