თბილისის მერიამ მუნიციპალური ნარჩენების მართვის სამოქმედო სტრატეგია შეიმუშავა
თბილისის მერიამ მუნიციპალური ნარჩენების მართვის 5-წლიანი სამოქმედო სტრატეგია შეიმუშავა.
თბილისის მერის კახა კალაძის განცხადებით, სტრატეგიით გათვალისწინებული ვალდებულებების შესრულების მიზნით მუნიციპალიტეტს, ევროპის რეკონსტრუქციისა და განვითარების ბანკსა (EBRD) და შპს "თბილსერვის ჯგუფს" შორის მემორანდუმი გაფორმდა. შეთანხმების შედეგად, დედაქალაქის ნაგავსაყრელ პოლიგონზე ნარჩენების დახარისხების (სორტირების) ხაზი და გაზშემკრები სისტემა მოეწყობა.
"ჩვენ ყველამ ვიცით, რა ვითარება გვაქვს ნაგავსაყრელზე და ამ პროექტების განხორციელება სასიცოცხლოდ მნიშვნელოვანია. გაწერილია გრაფიკი, თუ რომელი პროექტი რა ეტაპზე უნდა განხორციელდეს. ევროპის რეკონსტრუქციისა და განვითარების ბანკი მუდმივად მხარს უჭერს ქალაქის მუნიციპალიტეტს სხვადასხვა საინვესტიციო პროექტების განხორციელებაში. ამგვარად, მნიშვნელოვანია აღნიშნული პროექტის განხორციელება, რომელიც ნარჩენების დახარისხებასა და რეციკლირებას შეუწყობს ხელს“, - აღნიშნა თბილისის მერმა.
რაც შეეხება გაზშემკრების სისტემის მოწყობას, კახა კალაძის თქმით, საკმაოდ მნიშვნელოვანი პროექტია, რადგან დახარისხებული ნარჩენების დამუშავების შედეგად ელექტროენერგიის გამომუშავება მოხდება.
"გაზშემკრები სისტემის მოწყობა, უმთავრესად ორიენტირებულია, მწვავე გარემოსდაცვითი საკითხების აღმოსაფხვრელად და საყოფაცხოვრებო ნარჩენების პოლიგონის ევრო სტანდარტებთან დასაახლოებლად, რაც თავისთავად გაზრდის პოლიგონის არსებობისა და ფუნქციონირების რესურს.
ამასთან, ქალაქ თბილისის მუნიციპალიტეტისათვის ამ მასალის ამოღებით, როგორც ბიოგაზის, ასევე დახარისხებული ნარჩენების სახით, რაც საყოფაცხოვრებო ნარჩენების პოლიგონზე გროვდება, შესაძლებელია ეკონომიკური და ეკოლოგიური სარგებლის მიღება. ყველა განვითარებულ ქალაქში ნაგავსაყრელზე განთავსებულია სხვადასხვა ტიპის გადამამუშავებელი ინფრასტრუქტურა. ეს შეიძლება იყოს მიღებული გაზით გამომუშავებული ელექტროენერგია. ჩვენ ამ პროექტებს ეტაპობრივად განვახორციელებთ", - განაცხადა კახა კალაძემ.
