თამარ გაბუნია: ამ ეტაპზე დამატებითი აკრძალვების შემოღება არ იგეგმება
ჯანდაცვის მინისტრის მოადგილის თამარ გაბუნიას განცხადებით, დღევანდელი მდგომარეობით დამატებითი რეგულაციების ან რაიმე აკრძალვების შემოღება არ იგეგმება.
“თუმცა რა თქმა უნდა ეს ყველაფერი დამოკიდებული იქნება მომდევნო ეტაპებზე. ჩვენ ახლა ვართ პიკის ფაზაში“,- აღნიშნა თამარ გაბუნიამ.
მისი თქმით, ეპიდემიის მართვის აქტიური ინსტრუმენტია ვაქცინაცია, რაც ქვეყანას აქვს. აგრეთვე სიტუაციის მართვა დამოკიდებულია მოქალაქეების თვითშეგნებაზეც.
მინისტრის მოადგილე მოქალაქეებს მოუწოდებს, როგორც დახურულ, ისე ღია სივრცეში გამოიყენონ პირბადე, აგრეთვე თავი შეიკავონ ქორწილებისა და ხალხმრავალი ღონისძიებების მოწყობისგან.
“პროგნოზული გაურკვევლობა ბევრად უფრო მაღალი ხარისხის იყო წინა ტალღების შემთხვევაში, ვიდრე ჩვენ ეს დღეს გვაქვს. ასევე გარკვეული გამოცდილება ჯანდაცვის სექტორში დაგროვდა იმასთან დაკავშირებით, რამდენ შემთხვევას შეიძლება გავართვათ თავი. ჩვენი მთავარი რეკომენდაციაა, პირბადის გამოყენების წესის მაქსიმალურად აღსრულება“,- აღნიშნა თამარ გაბუნიამ.
მისი თქმით, მობილობის შეზღუდვა შესაძლებელია ისევ დადგეს დღის წესრიგში, თუ ჰოსპიტალური და ჯანდაცვის სექტორის შესაძლებლობა იქნება კრიტიკული.
“ჯერჯერობით ჯანდაცვის სექტორს აქვს იმის რესურსი, რომ მზარდი შემთხვევები მართოს, როგორც ბინაზე, ასევე ჰოსპიტალში“,- განაცხადა მინისტრის მოადგილემ.
