სტარტაპ სოციალური საწარმოებისთვის კონკურსი ჩატარდება

სტარტაპ სოციალური საწარმოებისთვის კონკურსი ჩატარდება. ამის შესახებ გადაცემა „ბიზნესი რუსთავი 2“-ზე პროექტის მენეჯერმა, ქრისტინე კანდელაკმა განაცხადა.

მისი ინფორმაციით, მონაწილეობა შეუძლია ყველა სტარტაპ ეტაპზე მყოფ სოციალურ საწარმოს ან საინიციატივო ჯგუფსა და ორგანიზაციებს, რომლებსაც სოციალური საწარმოს იდეა აქვთ და სურვილი, რომ განავითარონ და ჩამოაყალიბონ საკუთარი იდეა.

„კონკურსი არის ორ ეტაპიანი. პირველ ეტაპზე ვიღებთ იდეების განაცხადებს, რის შემდეგაც კომისია შემოსული განაცხადებიდან აარჩევს 8-დან 10-მდე იდეას. მეორე ეტაპი  ინტენსიური ტრენინგ პროგრამისგან შედგება, რომელიც სიღრმისეული ინფორმაციის მიღებას, ფინანსების დაგეგმვას, მარკეტინგსა და ა.შ მოიცავს.“ - აცხადებს კანდელაკი.

პროგრამა 2 თვის განმავლობაში გაგრძელდება.  შერჩეული 8-10 იდეა ტრენინგების პროცესში დაიხვეწება, რის შემდეგაც მონაწილეები კომისიასთან ბიზნეს გეგმის საბოლოო ვერსიას აგზავნიან.

აღსანიშნავია, რომ შერჩეული განცხადებებიდან მხოლოდ 4 ან 5 ბიზნეს იდეა დაფინანსდება. ჯამურად თითოეული იდეის დასაფინანსებლად 16 ათასი ევროა გამოყოფილი, თუმცა კონკურსში მონაწილეობისათვის აუცილებელი პირობაა სტარტაპმა მოთხოვნილი ბიუჯეტის 10%-იანი თანადაფინანსება წარადგინოს. 

კონკურსი ევროკავშირის დაფინანსებით ტარდება და განცხადებების მიღების ბოლო ვადა 20 აპრილია.