შოთა ბურჯანაძე: ჩემს კოლეგებს დამკვეთი უმტკიცებდა, რომ ნებადართულია ქორწილის გადახდა
რესტორატორთა ასოციაციის დამფუძნებელი შოთა ბურჯანაძე მიიჩნევს, რომ ქვეყანაში ეპიდვითარების გაუარესება ვაქცინაციის პროცესის დაგვიანებამ, აგრეთვე დიდმა თავშეყრებმა - ფესტივალებმა, ქორწილებმა და სხვა ღონისძიებებმა გამოიწვია. ამის მაპროვოცირებელი არის ისიც, რომ მთავრობამ რეგულაციების დამრღვევების მიმართ ამნისტია გამოაცხადა.
მისი თქმით, რეალურად ქვეყანაში რეგულაციები არსებობს, თუმცა მისი აღსრულების ადმინისტრირება არ ხდება.
“შეზღუდვები, რაც არსებობს, მისი აღსრულება უნდა გამკაცრდეს. კანონდამრღვევები რეალურად არსებობდნენ მრავლად, არ ხდებოდა მათი გამოვლენა. დღეს ქვეყანაში გვაქვს უამრავი ქორწილი, ქელეხი, ივენთები, ფესტივალები და ა.შ. ხუმრობენ კიდეც, რომ დელტა შტამი ყურებითაც გადადის. როდესაც ასეთ ძლიერ შტამთან გვაქვს საქმე, როგორ შეიძლება ეს 300 და 500 კაცში არ გავრცელდეს?!
მაპროვოცირებელი იყო გამოცხადებული ამნისტიაც, რის გამოც, საზოგადოებაში იყო აღქმა, რომ ყველაფერი უკვე თავისუფალია. ჩემს კოლეგებთან მისული დამკვეთი უმტკიცებდა, რომ ქორწილის გადახდა ნებადართულია. ამ დისკუსიაში შედიოდნენ და ასეთი ვითარება იყო, როდესაც ქორწილის ან სხვა ივენთის დაკვეთა უნდოდათ“, - აღნიშნა შოთა ბურჯანაძემ.
