შემოქმედებითად მსახიობები დიდი სტრესის ქვეშ არიან - მარჯანიშვილის თეატრი
მარჯანიშვილის თეატრის დირექტორის ეკა მეზვრიშვილის თქმით, გამკაცრებული რეგულაციების შემდეგ თეატრი არაერთი პრობლემების წინაშე დადგა. მიმდინარეობდა რეპეტიციები და ბევრი პროექტი იყო დაგეგმილი.
„ჯერჯერობით შეგვიძლია მხოლოდ ღია სივრცეში გავმართოთ სპექტაკლები. სეზონის დასრულების შემდეგ, 2 ოქტომბერს პრემიერა უნდა გვქონოდა თეატრში. სკამის გამოტოვება, თერმოსკრინინგი, დეზობარიერები, და სხვა რეკომენდაციები გათვალისწინებული იყო. რეპერტუარშიც ის სპექტაკლები დავტოვეთ, რომელსაც შესვენება არ ჰქონდა. თუ სიტუაცია ასე გაგრძელდა გაურკვეველია როდის მოგვეცემა მუშაობის საშუალება. მეტი კონტროლი, რომ ყოფილიყო ზაფხულის პერიოდში, ასეთ მდგომარეობამდე არ მივიდოდით და შესაძლოა თეატრიც არ დაკეტილიყო,“– აღნიშნავს ეკა მეზვრიშვილი.
თეატრის დირექტორის თქმით, სახელმწიფო უზრუნველყოფს ყველა თანამშრომლის ანაზღაურებას, რაც დიდი შეღავათია იმის ფონზე, რომ ქვეყანაში უამრავი ადამიანი ხელფასისა და სამსახურის გარეშე დარჩა.
„ჩვენს 250 თანამშრომელს ამ მხრივ პრობლემა არ შექმნია, არც თანამშრომლები შეგვიმცირებია. თუმცა, თეატრს ძალიან ბერვი სხვა ხარჯი აქვს რისი ანაზღაურებაც საკუთარი შემოსავლებიდან უწევს. შემოქმედებითად ძალიან დიდი სტრესის ქვეშ არიან მსახიობები. პანიკას არ უნდა მივეცეთ, რადგან განწყობა ძალიან მნიშვნელოვანია,“– ამბობს მარჯანიშვილის თეატრის დირექტორი ეკა მეზვრიშვილი.
