სავაჭრო მოლებში მომხმარებელთა ნაკადი მცირდება
სავაჭრო მოლებში მომხმარებლის ნაკადი ყოველთვიურად მცირდება. მომხმარებელთა რაოდენობა გასული წლის ანალოგიურ მაჩვენებლებს 30, ზოგ შემთხვევაში კი 60%-ითაც ჩამოუვარდება.
არსებულ მაჩვენებლებს ერთი მხრივ, გართულებული ეპიდემიოლოგიური ვითარება, მეორე მხრივ კი ლარის კურსის გაუფასურება უწყობს ხელს.
ზოგიერთ მოლში დამქირავებლებმა კომერიცული ფართების დახურვის გადაწყვეტილებაც მიიღეს, სავაჭრო ობიექტები მდგომარეობის გაუმჯობესებას 2021 წლის მარტიდან ელოდებიან.
"იქედან გამომდინარე რომ ყველა მოიჯარეს კარანტინის შემდეგ შევუმცირეთ იჯარის გადასახადი, ბუნებრივია, ჩვენი შემოსავალიც შემცირებულია. იჯარის გადასახადის შემცირებაზე გადაწყვეტილება მივიღეთ გაყიდვების მაჩვენებლის შემცირებიდან გამომდინარე, ტრაფიკი მთლიანობაში დაკლებულია დაახლოებით 60%-ით. ძალიან რთულია პანდემიის პირობებში ზუსტი პროგნოზის გაკეთება, თუმცა ძალიან დიდი იმედი გვაქვს, რომ მარტის შემდგომ მდგომარეობა გამოსწორდება", - ამბობს "ბიზნესპარტნიორთან" "ისთ ფოინთის" მარკეტინგის სამსახურის დირექტორი თეიკო ლომინაძე.
