საქართველო აზერბაიჯანული გაზის გატარების სანაცვლოდ წელს 1.014 მლრდ მ³ გაზს მიიღებს
2021 წელს საქართველო აზერბაიჯანული გაზის გატარების სანაცვლოდ 1.014 მლრდ მ³ გაზს მიიღებს, - აღნიშნულს 2021 წლისთვის დამტკიცებული ბუნებრივი გაზის ბალანსი ითვალისწინებს.
მიმდინარე წელს შაჰ-დენიზის საბადოდან მოპოვებული გაზიდან, საქართველოსთვის გამოყოფილი „დამატებითი გაზის“ მოცულობა 508.7 მლნ კუბ. მეტრი იქნება, „ოფციური გაზის“ – 505.96 მლნ მ³, რაც იმას ნიშნავს, რომ „სამხრეთ კავკასიური დერეფნიდან“ მისაღები გაზის მოცულობა 2020 წელთან შედარებით (888.6 მლნ მ³) 126 მლნ მ³-ით მეტი იქნება.
2021 წელს საქართველო აზერბაიჯანიდან ჯამში, 2.518 მლრდ მ³ გაზს მიიღებს. აქედან შაჰ-დენიზის წილი 1.014 მილიარდია, სოკარიდან მისაღები გაზის მოცულობა 1.504 მლრდ მ³-ს შეადგენს. კიდევ 200 მ³ ბუნებრივ გაზს საქართველო რუსეთიდან შეიძენს. ადგილობრივი მოპოვებაც იზრდება და 11.08 მლნ მ³-ის ოდენობით არის ნავარაუდევი. ჯამში გაზის მოწოდების პროგნოზი 2.729 მლრდ მ³-ს აღემატება.
რაც შეეხება მოხმარებას - 2021 წელს მოხმარება 2.694 მლრდ მ³-ით არის ნავარაუდევი. აქედან 1.794 მლრდ მ³ სოციალური მოხმარებაა (664.9 მლნ მ³ თბოსადგურები, 1.129 მლრდ - მოსახლეობა), 899.82 მლნ მ³-ს მოიხმარს კერძო სექტორი.
შეგახსენებთ, 2021 წლიდან აზერბაიჯანის შაჰ-დენიზის საბადოდან ევროკავშირში სამხრეთის გაზის დერეფნის მილსადენის სისტემის მეშვეობით გაზის მიწოდება დაიწყო. გაზის ტრანსპორტირება ევროპაში საქართველოსა და თურქეთის გავლით ხდება. მოწოდების მოცულობა ეტაპობრივად უნდა გაიზარდოს.
