სად იყო დაზღვეული ელიავას ბაზრობა - სადაზღვევო კომპანიები ზარალს ითვლიან
ელიავას ბაზრობა რამდენიმე სადაზღვევო კომპანიაში იყო დაზღვეული. საუბარია, როგორც მარაგების და ქონების დაზღვევაზე, ისე დადგენილებით გათვალისწინებული მასობრივი თავშეყრის ობიექტებისთვის პასუხისმგებლობის სავალდებულო დაზღვევაზე.
როგორც „ბიზნესპარტნიორმა“ გაარკვია, ელიავას ბაზრობაზე რამდენიმე მაღაზია სადაზღვევო კომპანია „პრაიმში“ იყო დაზღვეული. ამ შემთხვევაში საუბარია სავალდებულო დაზღვევაზე.
„ამ ეტაპზე უცნობია სწორედ ის მაღაზიები დაიწვა და მათ მფლობელებს მიადგათ ზარალი თუ არა. ჩვენი ჯგუფი გასულია ადგილზე და დამატებითი დეტალები უახლოეს საათებში გვეცოდინება,“ - აცხადებენ სადაზღვევო კომპანია „პრაიმში“.
რაც შეეხება მარაგების და ქონების დაზღვევას, ბაზრობაზე არსებული 4 მაღაზია „ჯიპიაი ჰოლდინგში“ იყო დაზღვეული. „ამ დროისთვის მიმდინარეობს შეფასება და ზარალის დათვლა. ჩვენი ჯგუფები აქტიურად მუშაობენ ადგილზე,“ - აცხადებენ „ჯიპიაი ჰოლდინგში“.
ცნობისთვის, ელიავას ბაზრობაზე წუხელ, გვიან ღამით გაჩენილი ხანძრის შედეგად ხის მასალების საწყობი და რამდენიმე მაღაზია დაიწვა.
დამწვარია დაახლოებით 1000 კვ.მ. ეს არის 14-15 მაღაზია.
