რუსთაველი-მთაწმინდის საბაგირო გზის მშენებლობა 50 მლნ დაჯდება
თბილისში, რუსთაველის გამზირიდან მთაწმინდასთან დამაკავშირებელი საბაგირო გზის მშენებლობის პროექტი აქტიურ ფაზაში ბრუნდება.
თბილისის მერის განცხადებით, გამოცხადდება ტენდერი, რითაც პროექტისთვის სამუშაოების შემსრულებელი გამოვლინდება.
საბაგირო გზას მანძილის დაფარვა 4 წუთში შეეძლება და საათში 1100 ადამიანის გადაყვანას შეძლებს. პროექტის სავარაუდო ღირებულება 50 მლნ ლარია.
„საბაგიროს გახსნის შემდეგ მთაწმინდაზე მოსახვედრად ადამიანებს ავტომობილების გადაადგილება აღარ დასჭირდება“, - ამბობს თბილისის მერი კახა კალაძე.
საბაგიროს თავდაპირველად ვარდების მოედანი და მთაწმინდა უნდა დაეკავშირებინა ერთმანეთისთვის, თუმცა შემდეგ მოგვიანებით ქვედა სადგურის ლოკაცია შეიცვალა და ახალ ლოკაციად „მეცნიერებათა აკადემიის“ მიმდებარე ტერიტორიაზე საბაგირო გზის ძველი სადგურის შენობა განისაზღვრა.
არქიტექტორთა საბჭოს გადაწყვეტილებას ძირითად საფუძვლად დაედო ის გარემოება, რომ მეცნიერებათა აკადემიის ეზოში არსებული ძველი სადგური 1956 წელს ექსპლუატაციაში შევიდა უშუალოდ, როგორც საჰაერო-საბაგირო გზის ქვედა სადგური და მისი გამოყენება შესაძლებელი იყო ახალ მარშრუტზე.
აღსანიშნავია, რომ ცოტა ხნის წინ, რუსთაველის გამზირიდან მთაწმინდის მიმართულებით საბაგირო გზის პროექტისთვის „თბილისის სატრანსპორტო კომპანიამ“ 8.3 მილიონის გამარტივებული შესყიდვა ითხოვა.
თანხა ჯერ კიდევ 2012 წელს, Doppelmayr-თან გაფორმებული კონტრაქტის საფუძველზე უკვე შესყიდული საბაგიროს ტექნოლოგიური ნაწილის გადკეთებას და ახალი დეტალების დამზადებას მოხმარდება.
„საბაგიროს პროფილის ცვლილებამ გამოიწვია იმის აუცილებლობა, რომ უნდა გადაკეთდეს უკვე შესყიდული საბაგიროს ტექნოლოგიური ნაწილი და დამზადდეს ახალი დეტალები, რათა ის გამოყენებადი იყოს ახალ ლოკაციაზე. თუმცა, საბაგირო გზის ტექნოლოგიური ნაწილი უკვე წარმოებულია (2012 წ.) და დასაწყობებულია ვულფურტში (ავსტრია) და ოლტენში (შვეიცარია), კომპანია Doppelmayr Seilbahnen GmbH ვეღარ იძლევა სრულფასოვან გარანტიას საციცოცხლოდ მნიშვნელოვანი დეტალების გამართულ ფუნქციონირებაზე და გვთავაზობს განხორციელდეს ტექნოლოგიური ნაწილის სრულფასოვანი კვლევა, რის შედეგადაც იგი გასცემს შესაბამის დასკვნას, ხოლო პრობლემების არსებობის შემთხვევაში, გასცემს რეკომენდაციას მათი აღმოფხვრის საშუალებების შესახებ. შესაბამისად, შესაძლებელია საბაგირო გზის ტექნოლოგიური ნაწილის დიდი ნაწილი კვლავ გამოყენებადი იყოს და აღარ გახდეს ახლის შეძენა საჭირო“, - ნათქვამია განმარტებით ბარათში.
აღსანიშნავია, რომ Dopplemayr-თან 2012 წლის 5 ივნისს გაფორმებული ხელშეკრულების სრული ღირებულება (4 064 300 ევრო) უკვე ანაზღაურებულია.
