რევაზ ვაშაკიძე: გახარიას, როგორც პრემიერ-მინისტრს, არ ვაფასებ დადებითად
„ძალიან ცუდია, რომ პრემიერმა თანამდებობა ასეთი რთული ეკონომიკური ვითარების დროს დატოვა“ - ასე შეაფასა „ჩირინას“ გენერალურმა დირექტორმა გიორგი გახარიას პოსტიდან გადადგომა.
მისი განმარტებით, იმ დროს, როცა ქვეყანაში საგარეო ვალი კატასტროფულად არის გაზრდილი, გახარიას წასვლა ეკონომიკურ მდომარეობას გააუარესებს.
„ქვეყანამ ამდენი ვალები აიღო, ვალებში ვართ გახვეული, შემოსავლები შემცირებულია და ამ მომენტში წასვლა ეკონომიკისთვის ძალიან ცუდია. ადამიანი, რომლის პრემიერობის დროსაც ქვეყნის საგარეო ფინანსური ვალდებულებები ასე მნიშვნელოვნად გაიზარდა, მიდის თანამდებობიდან, ჩემი აზრით არასწორია. ბევრი ვალები აიღო, გაიხარჯა არ გაიხარჯა რთული სათქმელია. ქვეყანა ისევ ვაქცინის გარეშეა. საჭირო იყო, ბოლომდე მიეყვანა თავისი დაწყებული საქმე,“ - განაცხადა რევაზ ვაშაკიძემ.
მისივე განმარტებით, გიორგი გახარიას ბიზნესის მხარდამჭერი აქტივობა მისი ეკონომიკის მინისტრად დანიშვნის შემდეგ შესუსტდა.
„ბიზნესთან ძალიან კომუნიკაბელური იყო როგორც ბიზნესომბუდსმენი. ეკონომიკის მინისტრი როცა გახდა, შემცირდა მისი აქტივობა. როგორც პრემიერ მინისტრს - არ ვაფასებ დადებითად,“ - განაცხადა ვაშაკიძემ.
მისივე განმარტებით, ისეთი ახალი პრემიერის შერჩევა, რომელიც არსებულ რთულ ეკონომიკურ ვითარებაში მართვის სადავეებს გადაიბარებს, რთული იქნება.
„მთლად დალაგებული ადამიანი მანდ არავინ მოვა და ამ ვალებს არ გადაიბარებს. ძალიან ძნელი იქნება, ჩემი აზრით ამ პასუხისმგებლობის აღება. ასევე ამ შერჩეულ ადამიანს უნდა ჰქონდეს თანადგომა საქართველოს მოსახლეობისგან, რომელიც ბევრადაა დანაწილეობული. რთულია ეს ყველაფერი,“ - აღნიშნა რევაზ ვაშაკიძემ.
