პრემიერი: პანდემია 2-3 წელი გაგრძელდება, აუცილებელია ვაქცინაციის ჩატარება
პრემიერ-მინისტრის ირაკლი ღარიბაშვილის განცხადებით, პანდემია წლის ბოლოს არ დასრულდება. მეცნიერები ზუსტ პროგნოზს ვერ აკეთებენ, რაგდგან ისინი ადამიანების ქცევებზე არიან დამოკიდებულები. პანდემია, შესაძლოა, 2-3 წელი გაგრძელდეს. შესაბამისად, აუცილებელია ვაქცინაცია.
“ბევრმა ქვეყანამ ჯერ კიდევ ვერ შეძლო ვაქცინების საკმარისი დოზის შეტანა, ჩვენ ეს მოვახერხეთ. შედეგია, რომ ქვეყანაში 3 მლნ-ზე მეტი ხარისხიანი ვაქცინა გვაქვს. ჩვენ ვისმენთ ჯანმოს წარმომადგენლების შეფასებებს, მათ პროგნოზებს, ეს პანდემია გაგრძელდება, წლის ბოლოს არ დასრულდება. ვინმეს არ ჰქონდეს იმის განცდა, რომ პანდემია დასრულდება წლის ბოლოს. შესაძლოა გაგრძელდეს კიდევ რამდენიმე წელიწადი, 2-3 წელი. მეცნიერები ვერ ამბობენ ზუსტ პროგნოზს, რადგან დამოკიდებულები არიან ადამიანების ქცევაზე. ჩვენი გონივრული ქცევა რა არის - აუცილებელია ვაქცინის ჩატარება“,- აღნიშნა ირაკლი ღარიბაშვილმა.
მისი თქმით, მიმდინარეობს საუბარი იმაზე, რომ კორონავირუსის საწინააღმდეგო ვაქცინა, მომდევნო 2-3 წლის განმავლობაში გრიპის ვაქცინის მსგავსად დამკვიდრდეს.
“აცრა აბსოლუტურად უსაფრთხოა, არავითარი გართულებები არ ახლავს თან. აშშ ყველაზე ძლიერი ქვეყანაა, სექტემბერში საბოლოოდ დაამტკიცებს “ფაიზერის“ ვაქცინას და გამოაცხადებს, რომ ყველა დონის ავტორიზაცია გაიარა ვაქცინებმა, რაც ნიშნავს იმას, რომ ამერიკა საკუთარი მოქალაქეებისთვის სავალდებულოს გახდის ვაქცინაციას. შესაბამისად, ჩვენ გვინდა თუ არ გვინდა, ამის გაკეთება მოგვიწევს. ვინც აცრას არ ჩაიტარებს, სამწუხაროდ გარდაცვალება მოგვემატება, ამიტომ, თავის დაზღვევის მიზნით საჭიროა ძალიან მარტივი აცრის ჩატარება.
დავარწმუნოთ ჩვენი მშობლები, შვილები, მეგობრები, ახლობლები რომ აიცრან. მე აცრილი ვარ, ჩემი ოჯახის ყველა წევრი აცრილია. აცრა გვიცავს სიკვდილისგან. ძალიან ბევრი ჯანმრთელი ადამიანი გარდაიცვალა კოვიდის გამო. ისინი ვერ წარმოიდგენდნენ, რომ კოვიდი მათ გარდაცვალებას გამოიწვევდა, მაგრამ სამწუხაროდ ასე მოხდა“,- განაცხადა პრემიერ-მინისტრმა.
