პრემიერი EU-ს წევრობაზე: ეს გრძელი გზაა, გვჭირდება რეფორმები და ეკონომიკის განვითარება
იმისათვის, რომ საქართველო ევროკავშირის წევრი ქვეყანა გახდეს, საჭიროა რეფორმების გატარება, ეკონომიკის გაძლიერება, სხვადასხვა პრობლემის დაძლევა, - ამის შესახებ პრემიერ-მინისტრმა ირაკლი ღარიბაშვილმა პოლონელ კოლეგასთან მათეუშ მორავიეცკისთან შეხვედრის შემდეგ გამართულ ერთობლივ ბრიფინგზე განაცხადა.
"საქართველოს ევროკავშირში გაწევრიანების შესახებ გაკეთებული განაცხადი მართლაც ისტორიული ნაბიჯია. ეს არის ქართველი ხალხის არჩევანი. ეს არ არის მხოლოდ ჩვენი მთავრობის გადაწყვეტილება, ეს არის ჩვენი მოსახლეობის გადაწყვეტილება. მჯერა და მოვისმინე პოლონეთის პრემიერისგან, რომ საქართველოს ექნება ძალიან დიდი მხარდაჭერა პოლონეთისგან ამ გზაზე. ჩვენ კარგად გვესმის, რომ ეს არის გრძელი გზა. გვჭირდება რეფორმების განხორციელება, ეკონომიკის განვითარება, ქვეყნის მომზადება, ბევრი პრობლემის დაძლევა იმისთვის, რომ ქვეყანა გახდეს ევროკავშირის წევრი. ჩვენ ასევე მოვისმინეთ ევროკავშირის ლიდერებისგან, რომ დაჩქარებულად რომელიმე ქვეყნის მიღება ევროკავშირში არ იგეგმება და ეს არის ხანგრძლივი პროცესი. მოტივირებულები ვართ. ზედმიწევნით ვასრულებთ ყველა იმ ვალდებულებას, რომელიც გაწერილია ასოცირების შეთანხმებაში. შეთანხმების გაფორმების შემდეგ ჩვენ გვქონდა კონკრეტული შედეგები ევროინტეგრაციის გზაზე, როგორიცაა თავისუფალი ვაჭრობა და უვიზო რეჟიმი, რომლითაც ჩვენი მოქალაქეები სარგებლობენ", - აღნიშნა ირაკლი ღარიბაშვილმა.
შეგახსენებთ, საქართველომ ევროკავშირის წევრობაზე განაცხადი დააჩქარა. კანდიდატი ქვეყნის სტატუსის მოსაპოვებლად განაცხადი 2024 წლის ნაცვლად 2022 წელს შეიტანა.
