პრემიერი: დადასტურდა, რომ საქართველოში სანქციების გვერდის ავლა არ ხდება

პრემიერის განცხადებით, აშშ-ის სახელმწიფო დეპარტამენტის ანგარიშით დადასტურდა, რომ საქართველოში სანქციების გვერდის ავლა არ ხდება. 

 

ამასთან, მისი თქმით, კერძო საკუთრების დაცვასთან მიმართებაში მიდგომა შეცვლილია. ყველა ადამიანს აქვს უფლება, თავისუფლად ფლობდეს ქონებას, განავითაროს ბიზნესი. 

 

"ბიზნესი არის ხელშეუხებელი, ისევე როგორც ადმიანების კერძო საკუთრება, ეს არის ხელშეუხებელი უფლება ჩვენი მოქალაქეების. ჩვენ მაქსიმალური გამჭვირვალობით ვმუშაობთ, ვიმუშავებთ და მომავალშიც ასე გავაგრძელებთ. 

 

რაც შეეხება ეკონომიკურ ზრდას,კარგად მოგეხსენებათ, როგორი მძიმე ვითარებაა დღეს მსოფლიოში, არა თუ ჩვენს რეგიონში. რა თქმა უნდა, პანდემიის დროს გლობალური ეკონომიკა შემცირდა, ქვეყნების ეკონომიკებმა განიცადეს უკუსვლა და 2020 წელს ჩვენ ასევე გვქონდა ძალიან დიდი ჩავარდნა ეკონომიკაში, მაგრამ გასულ წელს ჩვენს მიერ გადადგმული საკმაოდ გაბედული, გააზრებული და გონივრული ნაბიჯების შედეგად, ჩვენი ეკონომიკა შარშან გაიზარდა, უპრეცედენტოდ მაღალი ორნიშნა ზრდა მივიღეთ, 10,8 %-ის ზრდა მივიღეთ შარშან.

 

წელს თითქმის დასრულებულია შეიძლება ითქვას პანდემია, აღარ არის ისეთი გამოწვევა, მაგრამ 21-ე საუკუნის ყველაზე დიდი გამოწვევა რაც არის ომი უკრაინაში, არის ძალიან დიდი გამოწვევა ჩვენი რეგიონისთვის, ჩვენი ქვეყნებისთვის, მთელი ევროპისთვის და მსოფლიოსთვის. მოსალოდნელია, რომ წელს მსოფლიო ეკონომიკა შემცირდება და ევროპაში ელოდებიან რეცესიას, ძალიან რთული ვითარებაა ენერგეტიკის ფასთან დაკავშირებით, ინფლაცია არის დიდი გამოწვევა მთელ ევროპაში და მსოფლიოში შეიძლება ითქვას, ისტორიულ მაქსიმუმზეა ასული ინფლაცია და ხელშესახები ზრდა არ ფიქსირდება სხვა ქვეყნებში, ევროპის ქვეყნებსა და მთელ მსოფლიოში",- განაცხადა პრემიერმა.