ნონა გაფრინდაშვილი VS Netflix - გახმაურებულ საქმეზე სასამართლო მოსმენა დღეს გაიმართება
ნონა გაფრინდაშვილის გახმაურებულ სარჩელზე “ნეთფლიქსის” წინააღმდეგ აშშ-ს კალიფორნიის შტატის სასამართლოში ღია (ზეპირი) განხილვა, მხარეთა მონაწილეობით დღეს კალიფორნიის დროით 14:00 საათზე არის ჩანიშნული (საქართველოს დროით 25 იანვარს, 02:00 საათზე).
Netflix-ის შუამდგომლობასა და ნონა გაფრინდაშვილის საპასუხო პოზიციასთან დაკავშირებით სასამართლოს გადაწყვეტილებაც სწორედ ამის შემდეგ გახდება ცნობილი.
ქართველმა მოჭადრაკემ, ნონა გაფრინდაშვილმა Netflix-ის წინააღმდეგ ლოს ანჯელესის ფედერალურ რაიონულ სასამართლოში სარჩელი სექტემბერში შეიტანა. როგორც იცით საქმე ეხება ცნობილი სერიალის The Queen’s Gambit–ის ფინალურ ეპიზოდს, სადაც ცრუ ინფორმაციაა გაჟღერებული. ქართველი მოჭადრაკე 5 მლნ დოლარის ანაზღაურებას ითხოვს.
ქართველი მოჭადრაკე მიიჩნევს, რომ Netflix-მა მისი მიღწევები დააკნინა, რათა ბეთ ჰარმონი, შოუს მთავარი გმირი, წარმოედგინა, როგორც უფრო ძლიერი მოჭადრაკე.
ასევე, ნონა გაფრინდაშვილი მოხსენიებულია, როგორც რუსი მოჭადრაკე, რომელსაც არასოდეს უთამაშია მამაკაცებთან, რაც სიცრუეა.
აღსანიშნავია, რომ Netflix-მა სასამართლოში სამართალწარმოების შეწყვეტის შესახებ იშუამდგომლა.
ნონა გაფრინდაშვილის ინტერესების დამცვლებმა საპასუხო პოზიცია სასამართლოს 3 დეკემბერს წარუდგინეს.
სასარჩელო მოთხოვნაა ამოიღონ ნონა გადრინდაშვილის კარიერული მიღწევების დამაკნინებელი ეპიზოდები და Netflix-მა აანაზღაუროს ზარალი.
