NGO: დახურულ სივრცეში ელექტროსიგარეტის და გასახურებელი თამბაქოს მოწევა ჯარიმდება
თამბაქოს კონტროლის ალიანსი თამბაქოს ახალი პროდუქტების, ელექტრონული სიგარეტის, გასახურებელი თამბაქოს და ჩილიმის უკანონოდ გამოყენების შემთხვევებზე მიანიშნებს.
არასამთავრობო ორგანიზაციის ცნობით, ჯანმრთელობის ხელშეწყობის სახელმწიფო პროგრამის, თამბაქოს მოხმარების კონტროლის გაძლიერების კომპონენტის ფარგლებში, დეკემბერში ჩატარებული მონიტორინგის შედეგად დგინდება, რომ საზოგადოებრივი თავშეყრის დახურულ სივრცეში, სრულად აღმოფხვრილია თამბაქოს კლასიკური ნაწარმის, სიგარეტის მოწევა.
"მოწევის რეგულაციის დარღვევა ფიქსირდება ე.წ. თამბაქოს ახალი პროდუქტების, ელექტრონული სიგარეტის, გასახურებელი თამბაქოს და ჩილიმის უკანონოდ გამოყენების შემთხვევების სახით, რაც მასიური ხასიათის არაა, თუმცა, შესამჩნევია", - განმარტავენ ალიანსში.
მათივე განმარტებით, ამ ტიპის დარღვევებს საზოგადოებაში არასაკმარისი ინფორმაცია განაპირობებს. ამავდროულად ალიანსში იმედოვნებენ, რომ წელს წინა წლისგან განსხვავებით, ჯანდაცვის სამინისტრო იზრუნებს და მძლავრი საინფორმაციო-საკომუნიკაციო კამპანია ამოქმედდება. საკომუნიკაციო პროგრამის საშუალებით ინფორმირებული საზოგადოება თამბაქოს კონტროლის კანონსაც უკეთ აღასრულებს.
"სანამ სახელმწიფო პასიურობს და მოსახლეობას ინფორმაციას არ აწვდის, აქტიურობს თამბაქოს ინდუსტრია, რომელიც სხვადასხვა მეთოდებით ცდილობს მოქალაქეები დაარწმუნოს, რომ ელექტრონული სიგარეტი და გასახურებელი თამბაქო ნაკლებად მავლებელია როგორც მწეველისთვის, ისე ირგვლივ მყოფი ადამაინებისთვის, რაც სიმართლეს არ შეეფერება. ე.წ. თამბაქოს ახალი პროდუქტები არანაკლები ზიანის მომტანია როგორც უშუალოდ მომხმარებლისათვის, ასევე მის გარშემო მყოფთათვის ამასთან, ზოგიერთი ორგანიზაცია და დაწესებულება, განსაკუთრებით კაფე-ბარები და რესტორნები მომხმარებელს უცხადებენ, რომ მათთან ელექტრონული სიგარეტის და გასახურებელი თამბაქოს მოწევა ნებადართულია. გთხოვთ, არ დაუშვათ შეცდომა, საზოგადოებრივი თავშეყრის დახურულ სივრცეში იკრძალება თამბაქოს ნებისმიერი ნაწარმის მოწევა და რეგულაციის დარღვევის გამო ჯარიმდება როგორც ფიზიკური პირი, ისე ორგანიზაცია, რომელმაც არ სცადა მოწევის აკრძალვის რეგულაციის დარღვევის აღკვეთა, ან სცადა და მწეველის დაუმორჩილებლობის შემდეგ არ გამოიძახა სამართალდამცველები", - განმარტავენ არასამთავრობო ორგანიზაციაში.
არსებული რეგულაციით, დახურულ სივრცეში მოწევის აკრძალვის რეგულაციის დამრღვევი ჯარიმდება პირველ ჯერზე 100 ლარით, განმეორებით შემთხვევაში 200 და მესამე და ყოველ ჯერზე, ერთი წლის განმავლობაში 300-300ლარით. ორგანიზაცია, რომელიც თამბაქოს ნებისმიერი სახის ნაწარმის მოწევის აკრძალვის რეგულაციის დარღვევას არ აღკვეთავს, ჯარიმდება პირველ ჯერზე 500 ლარით, განმეორების შემთხვევაში 1000 ლარით და მესამე და ყოველ მომდევნო ჯერზე, ერთი წლის განმავლობაში 2000-2000 ლარით. იგივე რეგულაცია ვრცელდება ჩილიმის მოწევაზეც.
თამბაქოს კონტროლის ალიანსში განმარტავენ, რომ სამედიცინო დაწესებულებაში დეკემბრის თვეშიც დაფიქსირდა მოწევის აკრძალვის რეგულაციის დარღვევა. "ამჯერად, სამედიცინო ცენტრ „ვივამედში“ სატელევიზიო სიუჟეტით გავრცელებულ კადრებში ფიქსირდებოდა მოწევის ფაქტი, რაზეც საპატრულო ეკიპაჟი გამოვიძახეთ და მიმდინარეობს მოკვლევა", - განმარტავენ ალიანსში.
