მინისტრი: ექიმებმა მაგალითი უნდა მივცეთ ყველას პანდემიასთან ბრძოლისას წესების დაცვაში
ჩვენ, ექიმებმა მაგალითი უნდა მივცეთ ყველა სხვა დარგის წარმომადგენლებს, პანდემიასთან ბრძოლისას, წესების დაცვაში - ასე მიმართავს ქვეყნის ჯანდაცვის მინისტრი კოლეგებს.
მინისტრი თავის განცხადებაში, რომელიც ჯანდაცვის სამინისტრომ გაავრცელა კოლეგებს მოუწოდებს, დაგეგმილი კონფერენციები შესაძლებლობის ფარგლებში ონლაინ გაიმართოს.
„მოგესალმებით, ჩაქვის 21-ე პოლიპროფილური სამედიცინო კონფერენციის დელეგატებს, ექიმებს, კოლეგებს!
ამ სახის კონფერენციები, ნამდვილად მნიშვნელოვანია სამედიცინო სფეროს განვითარებისთვის, თანამედროვე მედიცინის მიღწევების გაზიარებისათვის და მათი, ჩვენ ყოველდღიურ პრაქტიკაში დანერგვისთვის.
ქვეყანაში არსებული ეპიდსიტუაციიდან გამომდინარე, მოგმართავთ თხოვნით, მაქსიმალურად გავითვალისწინოთ საერთაშორისო გამოცდილება და მსგავსი სახის კონფერენციები, რომლებიც ნამდვილად მნიშვნელოვანია დარგის განვითარებისთვის, თუ შესაძლებელია, ონლაინ პლატფორმაზე გადავიტანოთ. მაგალითისთვის გეტყვით, რომ რამდენიმე დღეში იგეგმება ჯანმოს ევროპის რეგიონული კომიტეტის 70-ე სესიიის ონლაინ პლატფორმის რეჟიმში ჩატარება.
ჯანდაცვის სამინისტროც მზადყოფნას გამოთქვამს, საკუთარი ონლაინ პლათფორმა შესთავაზოს კონკრეტულად ჩაქვის და მსგავსი სახის სხვა კონფერენციების მონაწილეებს.
წარმატებას ვუსურვებ კონფერენციის ყველა მონაწილეს და მივესალმები სამუშაო პროცესის გადატანას ონლაინ სივრცეში“, - ნათქვამია მინისტრის განცხადებაში.
შეგახსენებთ, რომ ჩაქვში სასტუმრო "ოაზისში" სამედიცინო კონფერენციის ერთ-ერთ მონაწილეს კორონავირუსი დაუდგინდა. კონფერენციაში 400-მდე ექიმის მონაწილეობას საზოგადოებაში არაერთგვაროვანი შეფასება მოჰყვა.
