MDF-მა 6 ქალაქისთვის 175 ახალი ავტობუსი შეისყიდა
6 ქალაქის ქუჩებში ოქტომბრიდან ახალი ავტობუსები ივლის. 175 ავტობუსი მუნიციპალური განვითარების ფონდმა, ურბანული ტრანსპორტის განვითარების პროგრამის ფარგლებში უკვე შეისყიდა.
ავტობუსები მიმდინარე წლის ოქტომბრიდან ეტაპობრივად გორს - 30, ზუგდიდს - 25, რუსთავს - 40, ქუთაისს - 60, ხოლო თელავსა და ფოთს 10-10 გადაცემა.
ურბანული ტრანსპორტის განვითარების პროგრამა ითვალისწინებს ქუთაისის, გორის, თელავის, ზუგდიდის, რუსთავისა და ფოთისთვის ახალი, თანამედროვე სტანდარტების შესაბამისი ავტობუსების შესყიდვას.
პროგრამის ბიუჯეტი 19 მლნ ევროა და მას ევროპის რეკონსტრუქციისა და განვითარების ბანკი (EBRD) აფინანსებს.
პროგრამის დეტალებზე მუნიციპალური განვითარების ფონდში მუნიციპალიტეტების წარმომადგენლებმა იმსჯელეს, განიხილეს ავტობუსების ჩამოტანის ეტაპები და ვადები. გარდა ავტობუსების შესყიდვისა, პროგრამა ითვალისწინებს ქალაქების ახალი სამარშრუტო გეგმისა და სატარიფო სისტემის შედგენას. პროგრამის ფარგლებში, დაგეგმილია ავტობუსების მძღოლების გადამზადებაც.
