კარლ ჰარცელი: საქართველოს მოქალაქეების ევროპაში ლეგალურად დასაქმების საკითხს მხარს დავუჭერ
საქართველოს მოქალაქეების ლეგალური დასაქმება ევროკავშირის ქვეყნებში სავარაუდოდ, მოხსნის იმ პრობლემებს, რომლებსაც ვიზალიბერალიზაციის მექანიზმის მოქმედების პროცესში ვაწყდებით - ამის შესახებ ევროკავშირის ელჩი საქართველოში კარლ ჰარცელი აცხადებს.
როგორც მან პასუხობს სოციალური მედიით დასმული კითხვების საპასუხოდ განაცხადა, საქართველოს მოქალაქეებისთვის ევროპაში დასაქმება დადებითი მოვლენა იქნება და ამ შესაძლებლობის განხილვას მხარს დაუჭერს.
„საქართველოს მოქალაქეებისთვის ევროკავშირის ცალკეულ წევრ სახელმწიფოებში არსებობს დასაქმების გარკვეული შესაძლებლობები, თუმცა, რამდენად სწრაფად და როგორ განვითარდება ეს პროცესი, ჯერ ვერ ვისაუბრებ. მე ვიცი, რომ მთავრობა და პრეზიდენტი ამ საკითხზე ევროპელ პარტნიორებთან ინტენსიურად საუბრობენ. პრინციპში, მე მხარს ვუჭერ ყოველივე ამას, რადგან მიმაჩნია რომ ასეთი შესაძლებლობები ხელს შეუწყობს დამატებითი შემოსავლების გაჩენას, ცოდნისა და გამოცდილების გაზიარებას, ადამიანებს შორის ურთიერთობების ჩამოყალიბებასა და დასაქმების კანონიერი გზების გაჩენას, რაც სავარაუდოდ მოხსნის იმ გარკვეულ პრობლემებს რომელბსაც ჩვენ ვაწყდებით ვიზალიბერალიზაციის მექანიზმის მოქმედების პროცესში. ამ მიზეზების გამო მიმაჩნია, რომ საქართველოს მოქალაქეებისთვის ევროპაში დასაქმება დადებითი მოვლენა იქნება და მხარს დავუჭერ ამ შესაძლებლობის შემდეგ განხილვას“ - განაცხადა კარლ ჰარცელმა.
