ირაკლი ლექვინაძე: ფარმაცევტულ ბაზარზე სამი კომპანიის წილი 60-70%-ის ფარგლებშია
ფარმაცევტულ ბაზარზე სამი კომპანიის წილი დაახლოებით 60-70%-ის ფარგლებშია, - ამის შესახებ კონკურენციის ეროვნული სააგენტოს თავმჯდომარემ დარგობრივი ეკონომიკისა და ეკონომიკური პოლიტიკის სხდომაზე განაცხადა.
ირაკლი ლექვინაძის განცხადებით, ეს ჯგუფური დომინორების მაჩვენებელია, თუმცა დომინირებული მდგომარეობის ქონა არ ნიშნავს რაიმე ტიპის დანაშაულს, სანამ ეს არ გამოყენება მოქალაქეებისა და მცირე კომპანიების საწინააღმდეგოდ, რაც უკვე გარკვეული პრობლემების მანიშნებელია.
მისი თქმით, ფარმაცევტული ბაზარი მაღალკონცენტრირებულია, როგორც იმპორტის, ასევე საცალო დონეზე და არავისთვის უცხო არ არის, რომ ფარმაცევტულ ბაზარზე 3 დომინანტი კომპანიაა. ბოლო პერიოდში, შეიძლება ითქვას, რომ ბაზარზე კონცენტრირების ხარისხი იკლებს.
"დომინანტობასთან ერთად, მსხვილი კომპანიები ჰოლდინგური ჯგუფების სახით არიან წარმოდგენილი, რაც მათ ძალაუფლებას მნიშვნელოვნად ზრდის და ჩვენი შეფასების მიხედვითაც, როდესაც კომპანია იმპორტის, დისტრიბუციის ნაწილს, კლინკას, ფარმაცევტულ ქსელს და დაზღვევის მთელ ერთეულებს ფლობს, ხშირად, ასეთ შემთხვევაში, მედიკამენტების გაყიდვისას გადაწყვეტილებები მიიღება არა მოქალაქის საუკეთესო არჩევანის გათვალისწინებით, არამედ აქცენტირება ხდება იმ მედიკამენტებზე, რომლის იმპორტიორიც ან მწარმოებელიც არის ეს კომპანია. მთლიან გაყიდვებში საკუთარი მედიკამენტების გაყიდვების წილი 60%-მდეა.” - აღნიშნავს ირაკლი ლექვინაძე.
მისივე თქმით, ზოგადად ფარმაცევტული ბაზარი მაღალკონცენტრირებულია ბევრ ევროპულ ქვეყანაში, თუმცა ამას თუ ახლავს შესაბამისი რეგულაციები, ასეთ შემთხვევაში ჰოლდინგური ჯგუფებიც არ წარმოადგენს პრობლემას.
