ინფიცირებულთა ზრდის ფონზე დამატებითი საწოლების მობილიზებაზე 48 მლნ დაიხარჯება

ახალი კორონავირუსის შემთხვევების ზრდის ფონზე, სახელმწიფო დამატებითი საწოლების მობილიზებას იწყებს და ამ მიზნით 48 მლნ ლარს დახარჯავს.

122 დღეში გასაწევი მომსახურების გამარტივებული შესყიდვის უფლება სოციალური მომსახურების სააგენტომ ითხოვა.

„ქვეყანაში არსებული პროფილური სამედიცინო დაწესებულებების (ინფექციური დაწესებულებები) საწოლფონდების რესურს გასცდა მოსალოდნელ ინფიცირებულთა ოდენობა. შექმნილი გარემოება ითხოვს დაუყონებლივ დამატებითი საწოლადგილების მობილიზებას“, - ნათქვამია შესყიდვების სააგენტოში წარდგენილ დოკუმენტაციაში.

აღსანიშნავია, რომ ბოლო დღეებში საქართველოში კორონავირუსის დადასტურებული შემთხვევები მკვეთრად გაიზარდა.

5 ოქტომბერს კორონავირუსის 578 ახალი შემთხვევა გამოვლინდა, აქედან 416 აჭარაში, 72 თბილისში, 44 იმერეთში.

ბოლო მონაცემებით, სულ ქვეყანაში 8696 შემთხვევაა დადასტურებული, გარდაცვლილია 54 პირი.