გახარია პომპეოს: პარტნიორობის გაძლიერების, რეგიონში აშშ-ის გაძლიერებული წარმომადგენლობის მომენტი დადგა
თქვენ ამ ქვეყნის ჭეშმარიტი მეგობარი ბრძანდებით! - ასე მიმართა საქართველოს პრემიერმა აშშ-ს სახელმწიფო მდივანს მაიკ პომპეოს. გიორგი გახარიამ სტრატეგიული პარტნიოროსბის მხარდაჭერისთვის მადლობა გადაუხადა. "ეს ყველზე მნიშვნელოვანი პარტნიორობაა, რაც გაგვაჩნია".
პრემიერმა აშშ-ის სახელმწიფო მდივანს მადლობა გადაუხადა გლობალური პანდემიის პერიოდში საქართველოში ვიზიტისთვის და ლუგარის ლაბორატორიის მნიშვნელობაზეც ისაუბრა.
„ძალიან წარმატებული თანამშრომლობა გვაკავშირებს ლუგარის ლაბორატორიის სახით, რომელიც მეტად საკვანძო ასპექტია ახალ კორონავირუსთან ბრძოლის საქმეში. ნამდვილად ვაფასებთ შეერთებული შტატების ხალხისა და მთავრობის უწყვეტ მხარდაჭერას საქართველოს ტერიტორიული მთლიანობისა და სუვერენიტეტისადმი. კარგად იცით, რამდენად მნიშვნელოვანია ეს საკითხი ჩვენი ქვეყნისთვის, რომლის ტერიტორიები ოკუპირებულია, რადგან საოკუპაციო ძალები კვლავ არიან განთავსებული ჩვენს მიწაზე. ჩვენ ვიცით, რომ ეს სტრატეგიული პარტნიორობა უპირველეს ყოვლისა ეფუძნება ფასეულობებს - თავისუფლებას, დემოკრატიას და რა თქმა უნდა, საერთო გეოსტრატეგიულ ინტერესებს. რეგიონისთვის ამ ძალიან ცვალებად დროში ვაცნობიერებთ, რომ ეს საკითხებია განსახილველი. ძალიან კარგი შესაძლებლობა გვეძლევა მნიშვნელოვანი საკითხების განსახილველად, შეერთებულ შტატებსა და საქართველოს შორის თავდაცვისა და უსაფრთხოების, ეკონომიკისა და დემოკრატიის კონსოლიდაციის საკითხებზე თანამშრომლობის გასაღრმავებლად. მინდა დაგარწმუნოთ, რომ ნამდვილად ვგრძნობთ, რომ ჩვენი თანამშრომლობისა და პარტნიორობის გაძლიერების, ასევე ამ რეგიონში შეერთებული შტატების გაძლიერებული წარმომადგენლობის მომენტი დადგა. კიდევ ერთხელ მოგესალმებით და მადლობას გიხდით საქართველოში ვიზიტისთვის“, - მიმართა გიორგი გახარიამ მაიკლ პომპეოს.
