Frontera-ს გათავისუფლებულ თანამშრომლებს მთავრობა ₾1 200-ის კომპენსაციას მისცემს

ამერიკული კომპანია Frontera-ს მიერ გათავისუფლებულ, უხელფასოდ დარჩენილ თანამშრომლებს მთავრობა 1 200 ლარის კომპენსაციას მისცემს.

ნათია თურნავას თქმით, მთავრობა 84 ადამიანს დაეხმარება, კომპანიას კი დაახლოებით 17 თვის სახელფასო დავალიანება ერიცხება.

ეკონომიკის მინისტრის განმარტებით, მიუხედავად იმისა, რომ მთავრობამ „ფრონტერას“ წინააღმდეგ საერთაშორისო არბიტრაჟი მოიგო, მთავრობამ მიიღო გადაწყვეტილება, არ მოშალოს კომპანიასთან ხელშეკრულება და მისცეს საშუალება, რომ გააგრძელოს მოპოვებითი სამუშაოები სალიცენზიო არეალის ფარგლებში.

„ამ ეტაპზე კომპანიასთან საკმაოდ პოზიტიურ და აქტიურ კომუნიკაციაში ვართ და ვემზადებით გარკვეული ტექნიკური, ღია საკითხების გასავლელად“, - აღნიშნა ნათია თურნავამ.

მინისტრის განმარტებით, მთავრობა კვლავაც მოუწოდებს კომპანია „ფრონტერას“, რომ დღესდღეობით როდესაც აღარ არსებობს რაიმე შემაფერხებელი გარემოება იმისთვის, რომ მათ თავიანთი ვალდებულებები შეასრულონ, არის მოლოდინი, რომ ისინი დაფარავენ ამ სახელფასო დავალიანებას.

„მანამდე კი, ვიდრე „ფრონტერასთან“ ეს დიალოგი გრძელდება, ამ ადამიანებისთვის ერთჯერად, ძალიან მნიშვნელოვან დახმარებას გავცემთ“, - დასძინა ნათია თურნავამ.