ფოთის ნავსადგურთან შემოვლითი გზა გაკეთდება - პროექტზე "კოკს კონსალტი" მუშაობს
ფოთში სანავსადგურო ტერმინალებთან და სანაპიროსთან დამაკავშირებელი, ახალი შემოვლითი გზის პროექტზე „კოკს კონსალტი“ მუშაობს.
ფოთის მერიის ცნობით, დასახლებული უბნების გვერდის ავლით აშენდება საავტომობილო გზა, რომელიც ნავსადგურს, თავისუფალ ინდუსტრიულ ზონას, ეკონომიკური გაფორმების ზონასა და სხვა ტერმინალებს დაუკავშირდება.
ინდუსტრიული ზონის ინჟინრებთან ერთად, ალტერნატიული გზის მშენებლობის პროცესში თიზ-ის ჩართულობასა და სხვა ტექნიკურ საკითხებზე დღეს ფოთის მერიაში იმსჯელეს.
ქალაქის მერიაში აცხადებენ, რომ ფოთის ნავსადგურში გაზრდილმა ტვირთბრუნვამ, მძიმეწონიანი ავტომობილების გადაადგილების ინტენსივობამ, ახალი საწარმოების მშენებლობამ, დღის წესრიგში დააყენა ალტერნატიული, შემოვლითი, გზის მშენებლობის აუცილებლობა, რომელიც ნავსადგურის ტერმინალებს, თვისუფალ ინდუსტრიულ ეკონომიკური გაფორმების ზონებს, ქალაქის დასახლებული უბნების გვერდის ავლით ცენტრალურ ავტომაგისტრალთან დააკავშირებს.
