ერთხელ ვაქცინირებული კოვიდგადატანილები, ორჯერ აცრილებთან გათანაბრდებიან
კოვიდგადატანილი პირები, ვაქცინის ერთი დოზის გაკეთების შემთხვევაში, სრულად ვაქცინირებულად ჩაითვლებიან და მათზეც გავრცელდება ის რეგულაციები, რაც სრულად ვაქცინირებული პირებისთვის.
უწყებათაშორის საკოორდინაციო საბჭოსთან არსებული ოპერაციული შტაბის უფროსის გიორგი ღიბრაძის განცხადებით, მათზეც გავრცელდება იგივე რეგულაცია, რაც არის სრულად ვაქცინირებულებისთვის.
“პირობითად საქართველოში რომ შემოდის ადამიანი, თუ ის ორჯერ არის ვაქცინირებული, მას არ ეხება შეზღუდვები საზღვრის კვეთისას. აგრეთვე სხვა რეგულაციები, იგივე დასწრება სემინარებზე და ა.შ. ბევრი ქვეყნის პრაქტიკაა, როდესაც ადამიანს გადატანილი აქვს კოვიდი, იქ იცრებიან ერთხელ და იქ ითვლება სრულად ვაქცინირებულ პირად. შესაბამისად, ჩვენთანაც ხდება გათანაბრება ამ სტატუსის. თუ ადამიანს გადატანილი აქვს და ერთხელ არის აცრილი, იგივე სტატუსი აქვს, რაც ორჯერ აცრილს ადამიანს“, - აღნიშნა გიორგი ღიბრაძემ.
