საზოგადოება
05/08/2020
ბორჯომში ნიკოლოზ II-ის საზაფხულო რეზიდენცია მუზეუმად გადაკეთდება
ბორჯომში, ,,კავალერიის შენობის“ რესტავრაციასა და მუზეუმად ადაპტაციაზე 3 მლნ ლარი დაიხარჯება. კავალერიის შენობა და მისი მიმდებარე ტერიტორია კულტურული მემკვიდრეობის ძეგლია. შენობაც და მისი მიმდებარე პარკიც რუსეთის იმპერატორ ნიკოლოზ მეორეს საზაფხულო რეზიდენცია ყოფილა.
1880 წელს აშენებული შენობა ფსევდო გოთიკური სტილის გამორჩეული ნიმუშია. რეაბილიტაციის პროექტს მუნიციპალური განვითარების ფონდი მსოფლიო ბანკის დაფინანსებით ახორციელებს.
პროექტი ითვალისწინებს კოსტავას სახელობის პარკში მდებარე "კავალერიის კორპუსის" სრულ რეაბილიტაციას. მუზეუმში განთავსდება საგამოფენო დარბაზები, საკონფერენციო და საგანმანათლებლო სივრცეები, კაფე, ბიბლიოთეკა, მედიათეკა და სველი წერტილები. დაგეგმილია მუზეუმის მიმდებარე ტერიტორიის კეთილმოწყობაც. შენობა სრულად იქნება ადაპტირებული შეზღუდული შესაძლებლობების მქონე პირებისთვის.
