"ანდიო ლენდი" ახალი ატრაქციონების დამატებას გეგმავს
თბილისის ზოოპარკის ტერიტორიაზე გახსნილ სივრცეს, რომელიც, როგორც განსაკუთრებული საჭიროებების მქონე, ასევე ტიპიური განვითარების ბავშვებზეა მორგებული, ახალი ატრაქციონები შეემატება.
როგორც „ანდიო ლენდის“ თანადამფუძნებელმა ილიკო თვალიაშვილმა „ბიზნესპარტნიორთან“ განაცხადა, მულტიფუნქიურ პარკს უახლოეს კვირებში 2 სახის ზიპლაინი შეემატება. წელს პარკს მოტორიკის ბილიკიც დაემატება.
სამომავლო გეგმებში განსაკუთრებული საჭიროებების მქონე ბავშვებზე ადაპტირებული ლაბირინთისა და ორმეტრიანი აიწონა-დაიწონას დამატებაც შედის.
როგორც ილიკო თვალიაშვილი აცხადებს, ატრაქციონების ჩამონათვალი, დროთა განმავლობაში, კიდევ უფრო მრავალფეროვანი გახდება. გრძელვადიან პერიოდში კი, „ანდიო ლენდი“ გაფართოებას და მულტიფუნქციური გასართობი სივრცეების გახსნას საქართველოს სხვადასხვა ქალაქშიც გეგმავს.
შეგახსენებთ, რომ „ანდიო ლენდი“ 16 სახის საქანელას, გონების სავარჯიშო თამაშობებს (ანბანი; ფაზლები), ბურთების აუზსა და სხვა ატრაქციონებს აერთიანებს.
