ვენეციის ისტორიულ ლაგუნაში საკრუიზო გემების მიღება იკრძალება
იტალიის მთავრობამ ვენეციის ისტორიულ ლაგუნაში დიდი საკრუიზო გემების აკრძალვის მიზნით ზომები მიიღო. Bloomberg-ის ცნობით, მიზანი ქალაქის ზედმეტი ტურიზმისგან დაცვაა.
მთავრობის განკარგულება 1-ლი აგვისტოდან შევა ძალაში, რომლის თანახმადაც დიდი საკრუიზო გემებისა და მსხვილი კომერციული ხომალდების მიღება აიკრძალება.
ამასთან, მინისტრთა კაბინეტმა 157 მილიონი ევრო გამოყო ახლომდებარე ქალაქ მარგერაში დროებითი პორტის ასაშენებლად.
ლაგუნასა და სან მარკოს მოედანზე შესასვლელი გზა წლების განმავლობაში დავის საგანი იყო გარემოს დამცველებს, ტურისტულ ასოციაციებსა და საკრუიზო ოპერატორებს შორის. დაძაბულობამ 2019 წელს იმატა, როდესაც ერთ-ერთი საკრუიზო გემი ლაგუნის პატარა ტურისტულ ნავს შეეჯახა და ხუთი ადამიანი დაშავდა.
მიმდინარე კვირაში იუნესკომ რეკომენდაცია გამოსცა, ვენეცია საფრთხის ქვეშ მყოფი ქალაქების მსოფლიო მემკვიდრეობის სიაში შევიდეს.
