Twitter-ის რებრენდინგი გრძელდება - კომპანიის სათაო ოფისიდან ძველ ლოგოებს ხსნიან

Twitter-ის რებრენდინგი გრძელდება - კომპანიის სან-ფრანცისკოს სათაო ოფისიდან ძველ ლოგოებს ხსნიან.

ლურჯი ჩიტის ლოგო, რომელსაც 17 წლიანი ისტორია აქვს და რომელიც იდეების მაუწყებლის სიმბოლოდ იქცა მსოფლიოში, მილიარდერმა ელონ მასკმა შეცვალა. ახლა კომპანიას Twitter as X ჰქვია და მისი ახალი ლოგო ერთგვარად, "ყველაფერის აპლიკაციის" შექმნაზე მიანიშნებს.

ოქტომბერში Twitter-ის შესყიდვის შემდეგ, მასკმა განაცხადა, რომ ის აპლიკაციას ხედავს პლატფორმად, რომელსაც შეუძლია სოციალური მედიის გარდა, მომხმარებლებს სხვადასხვა სერვისები შესთავაზოს. მათ შორის ისეთები, როგორიცაა peer-to-peer გადახდები, ასევე, ისეთი მომსახურებები, როგორიც დანერგილია პოპულარულ ჩინურ WeChat App-ში.

აღსანიშნავია, რომ ილონ მასკის მმართველობის შემდეგ, კომპანია ისეთი ქარტეხილების წინაშე დგას, როგორიცაა თანამშრომელთა ხმაურიანი გათავისუფლებები, რეკლამის განმთავსებელთა რაოდენობის მკვეთრი ვარდნა და Meta-ს მიერ შექმნილი კონკურენტის - Threads-ის უსწრაფესი ზრდა.