ტრამპის ანგარიშის დახურვამ Twitter-ის აქციები გააუფასურა

დონალდ ტრამპის ანგარიშის დახურვის შემდეგ Twitter-ის აქციების ფასი მკვეთრად დაეცა.

სოციალური ქსელის აქციების ღირებულება ნიუ-იორკის ბირჟაზე 7.5%-ზე მეტად შემცირდა. აქციები „წითელ ზონაშია“ მას შემდეგ, რაც Twitter-მა აშშ-ს პრეზიდენტის პირადი ანგარიშის სამუდამოდ გაუქმების გადაწყვეტილება მიიღო. 

ამ გადაწყვეტილებას კი წინ 6 იანვარს ვაშინგტონში მომხდარი პროცესები უძღოდა, როდესაც 6 იანვარს ტრამპის მომხრეთა ნაწილი კაპიტოლიუმში შეიჭრა, სადაც კონგრესის სხდომა მიმდინარეობდა. 7 იანვარს Twitter-მა დროებით დაბლოკა ტრამპის „ექაუნთი“ და 3 პოსტის წაშლაც მოითხოვა, რაც სოციალური ქსელის შეფასებით მის წესებს ეწინააღმდეგებოდა.

ტრამპს Twitter-ზე 88 მლნ გამომწერი ჰყავდა. ის აქტიურად იყენებდა სოციალურ ქსელს და დღეში საშუალოდ 10 „ტვიტს“ აქვეყნებდა.