JP Morgan-ი First Republic-ის აქტივებს და დეპოზიტებს ყიდულობს
შეერთებული შტატების მარეგულირებლები აცხადებენ, რომ First Republic Bank დაყადაღებულია და თანხმობას აცხადებენ ბანკის JPMorgan Chase & Co-სთვის მიყიდვაზე. ეს მესამე მსხვილი ამერიკული საფინანსო ინსტიტუტია, რომელიც ბოლო ორი თვის განმავლობაში ჩამოიშალა.
უოლ სტრიტის უმსხვილესი ბანკი მიიღებს First Republic Bank-ის აქტივების უმეტეს ნაწილს და ყველა დეპოზიტს, მათ შორის დაუზღვეველ დეპოზიტებს - ნათქვამია მარეგულირებლების განცხადებაში.
JPMorgan ერთ-ერთი იყო იმ დაინტერესებულ ორგანიზაციებს შორის, რომელთაც შესყიდვის სურვილი გამოთქვეს. მათ შორის იყვნენ PNC Financial Services Group და Citizens Financial Group Inc, რომლებმაც წინადადებები მარეგულირებლების მიერ გამოცხადებულ აუქციონზე წარადგინეს.
ერთ-ერთმა რეგულატორმა - კალიფორნიის ფინანსური დაცვისა და ინოვაციების დეპარტამენტმა დღეს დილით გამოაცხადა, რომ First Republic Bank მისი ხელმძღვანელობის ქვეშ იყო და რომ ფედერალური დეპოზიტების დაზღვევის კორპორაცია (FDIC) იმოქმედებდა, როგორც მიმღები.
თავის მხრივ, FDIC-ის განცხადებაში დეპოზიტების დაზღვევის ღირებულება დაახლოებით $13 მილიარდით განისაზღვრა.
„ჩვენმა ფინანსურმა სიძლიერემ, შესაძლებლობებმა და ბიზნეს მოდელმა საშუალება მოგვცა შეგვემუშავებინა ტრანზაქციის განხორციელების წინადადება ისე, რომ მინიმუმამდე შეგვემცირებინა ხარჯები დეპოზიტების დაზღვევის ფონდისთვის“- განაცხადა JPMorgan Chase-ის თავმჯდომარემ, აღმასრულებელმა დირექტორმა ჯეიმი დიმონმა.
ბანკი გადარჩენას ორ თვის განმავლობაში ცდილობდა, მას შემდეგ, რაც Silicon Valley Bank-მა და Signature Bank-მა კრედიტორების მხრიდან დეპოზიტების გატანას ვერ გაუძლეს.
FDIC-ის განცხადებაში ნათქვამია, რომ 13 აპრილის მდგომარეობით, First Republic Bank-ის მთლიანი აქტივების ღირებულება $229,1 მილიარდი იყო, დეპოზიტები - $103,9 მილიარდი.
წარუმატებელი ბანკის 84 ოფისი რვა შტატში ხელახლა გაიხსნება, როგორც JPMorgan Chase Bank-ის ფილიალები.
