ისრაელის კლინიკები რეაბილიტაციის სერვისებში ინვესტიციებს ზრდიან
საომარ პირობებში, ისრაელის კლინიკები რეაბილიტაციის სერვისებში ინვესტიციებს ზრდიან.
იხილოვის კლინიკა აცხადებს, რომ 10 მილიონ დოლარს ჩადებს ომში დაჭრილი ადამიანების რეაბილიტაციის სისტემის გაფართოებისთვის.
ამ მიზნით პირველ ეტაპზე 120 საწოლი იქნება გამოყენებული, რასაც დღის სტაციონარის 100 ადგილი დაემატება, ასევე იმუშავებს ფსიქიკური მხარდაჭერის განყოფილება.
კლინიკაში რეაბილიტაციის პროცესი პაციენტის ჰოსპიტალიზაციისთანავე იწყება. ინვესტიციების მიზანი არის მშენებლობა, თანამედროვე აპარატურის შეძენა, ადამიანური რესურსის მოზიდვა და ბევრი სხვა რამ.
იხილოვის კლინიკის დირექტორი, პროფესორის რონი გამზო ამბობს, რომ ომის დაწყებიდან დღემდე ქვეყანაში დაახლოებით 3 ათასი ადამიანი დაიჭრა, რომელთაგან მესამედს მაინც საავადმყოფოში რეაბილიტაცია დასჭირდება, მათ შორის როგორც ფიზიკური, ისე ფსიქოლოგიური. „სამწუხაროდ, ველოდებით, რომ კიდევ უფრო მეტი დაჭრილი გვეყოლება,“ - განაცხადა გამზომ. მისი შეფასებით, ესაა ისრაელის ჯანდაცვის სისტემის ერთერთი ყველაზე დიდი პრობლემა და ამ კუთხით იხილოვის სამედიცინო ცენტრი სარეაბილიტაციო სერვისების ავანგარდში იქნება. კლინიკა აპირებს, მოთხოვნის შესაბამისად, ინვესტიციები გაზარდოს და დამატებითი თანხების მობილიზებაზე იზრუნოს.
