წლის ბოლომდე DRG-სისტემა მშობიარობასა და საკეისრო კვეთაზეც ამოქმედდება
წლის ბოლომდე, დაფინანსების DRG-სისტემა მშობიარობას, საკეისრო კვეთასა და ნეონატალური ასაკის ინტენსიურ მკურნალობას შეეხება. ინფორმაციას ჯანდაცვის სამინისტრო ავრცელებს.
მათივე ინფორმაციით, 10 თვის განმავლობაში, დიარჯის შემოღებიდან დღემდე დაახლოებით ნახევარი დიარჯის მეთოდოლოგიით მილიონი შემთხვევა დაფინანსდა.
DRG-ის უწყებათაშორისი საკოორდინაციო საბჭოს წევრების ინფორმაციით, საქართველოში DRG მოდელის ამოქმედების შემდეგ, სამედიცინო სერვისებზე პაციენტის თანაგადახდა მნიშვნელოვნად, 27%-დან 10%-მდე შემცირდა.
აღნიშნული შედეგების გათვალისწინებით, ჯანდაცვის სამინისტროში მიღებულ იქნა გადაწყვეტილება, რომ წლის ბოლომდე, დაფინანსების DRG-სისტემა სხვა სერვისებზეც ამოქმედდეს.
შეგახსენებთ: ამ ეტაპზე, DRG სისტემა არ ვრცელდება შემდეგ სამედიცინო მომსახურებაზე:
გეგმური და გადაუდებელი ამბულატორია;ნეონატალური ასაკის (ნეონატალურ ასაკში დაწყებული) ინტენსიური მოვლა/მკურნალობა;
გულის თანდაყოლილი მანკების მკურნალობა;
მშობიარობა / საკეისრო კვეთა; ქიმიოთერაპია, ჰორმონოთერაპია და სხივური თერაპია და მასთან დაკავშირებული გამოკვლევები და მედიკამენტები;
კომბუსტიოლოგია (მოზრდილთა სტაციონარული დახმარება);
თრომბოლიზისი და თრომბექტომია, ინსულტის შემთხვევაში; სხვა მაღალტექნოლოგიური სამედიცო მომსახურება.
საყოველთაო ჯანდაცვის მონაწილე კლინიკებისთვის ანაზღაურების ახალი სისტემა 2022 წლის 1 ნოემბრიდან ამოქმედდა
DRG-მოდელი საყოველთაო ჯანდაცვის პროგრამის ფარგლებში დაფინანსების მოცულობას პაციენტის დიაგნოზისა და სხვა რამდენიმე ფაქტორზე დაფუძნებით განსაზღვრავს. ასეთი შეიძლება იყოს ასაკი, სქესი, გეოგრაფიული ლოკაცია და სხვა.
მთავარი პოზიტიური შედეგი, რომელსაც ჯანდაცვის სამინისტრო ამ სისტემის ამოქმედების შემდეგ ელოდებოდა, პაციენტის მიერ დამატებითი თანხის გადახდის პრაქტიკის აღმოფხვრაა. მაგალითად, კლინიკა პაციენტს ისეთი სერვისებისთვის, როგორიცაა ვიპ-პალატა, აყვანილი ექიმი, გარკვეული სახარჯი მასალა და ა.შ. – დამატებით თანხას ვეღარ მოსთხოვს. ხოლო თუ პაციენტს ამ სერვისების მიღება სურს, მას შეუძლია, ერთჯერადად გამოეთიშოს საყოველთაო ჯანდაცვის პროგრამას, რომელსაც ამ სერვისის მიღებისთანავე დაუბრუნდება.
ცვლილებების თანახმად, კლინიკა, რომელიც პაციენტს დადგენილ ანაზღაურებაზე მეტ თანხას გადაახდევინებს, ამ შემთხვევისთვის დაწესებული ტარიფის სამმაგი ოდენობით ჯარიმდება. დარღვევის გამეორების შემთხვევაში კი საყოველთაო ჯანდაცვის პროგრამას 6 თვით გამოეთიშება.
