წელს საბანკო სექტორი 20%-იან მომგებიანობაზე გავა
ბანკების მაღალი მოგება განპირობებული იყო ბანკების საკრედიტო დანაკარგების სარეზერვო ხარჯის სიმცირით, - სებ-ის ვიცე-პრეზიდენტმა პაპუნა ლეჟავამ, სექტორის 2021 წლის მომგებიანობაზე (₾2,08 მლრდ ) დეპუტატების კითხვებზე საპასუხოდ განაცხადა.
მისი თქმით, ბანკებმა 1.2 მლრდ ზარალი ნახეს კოვიდის შოკით, რომელიც ფარავდა 3 წლის ჯამურ შოკს, შესაბამისად მომდევნო წლებში სექტორს ზარალი აღარ უნახავს.
ლეჟავამ აღნიშნა, რომ 2020 წელს კაპიტალზე ბანკების მომგებიანობა 2% იყო, ინვესტორების მოლოდინზე 10-ჯერ ნაკლები.
საფინანო-საბიუჯეტო კომიტეტის სხდომაზე, სებ-ის ვიცე-პრეზიდენტმა დეპუტატებს კონცეპტუალურადაც უპასუხა, რომ კონკურენციის პირობებში ცალკეული კომპანიის ზემოგებაზე გასვლა გამორიცხულია. ისე რომ ინვესტორების მოლოდინს გადააჭარბოს, რადგან საბანკო პროდუქტებზე ფასდადება ინვესტორების მოლოდინის შესაბამისად ხდება და ეს მოლოდინი კაპიტალზე 20%-იანი უკუგებაა.
საქართველოს საბანკო სექტორის მომგებიანობა კი 17-18%-ის ფარგლებში მერყეობს. როგორც პაპუნა ლეჟავამ "ბიზნესპარტნიორთან" განაცხადა, მისი მოლოდინით წელს საბანკო სექტორი 20%-იან მომგებიანობაზე გავა. H1/2022-ის მონაცემებით, კაპიტალზე უკუგება (ROE გაწლიურებული) 20.7%-ია.
