თიბისი სამეთვალყურეო საბჭოს ახალ თავმჯდომარეს და წევრს ეძებს
თიბისი ბანკი სამეთვალყურეო საბჭოს ახალ თავმჯდომარეს და წევრს ეძებს.
ეროვნული ბანკის მიერ კომერციული ბანკებისთვის კორპორაციული მართვის სტანდარტების შემოღების შემდეგ თანამდებობების დატოვება მოუწევთ სამეთვალყურეო საბჭოს თავმჯდომარეს ნიკოლოზ ენუქიძეს, ასევე ნიკოლას დომინიკ ჰააგს, რომელიც თიბისი ბანკის სამეთვალყურეო საბჭოს უფროსი დამოუკიდებელი წევრი და აუდიტის კომიტეტის თავმჯდომარეა.
კორპორაციული მართვის კოდექსის განახლებული ვარიანტით, დაზუსტდა და დაიხვეწა სამეთვალყურეო საბჭოს დამოუკიდებელი წევრის კრიტერიუმები, თუ აქამდე 9 წლის მანძილზე ითვლებოდა პირი დამოუკიდებელ წევრად, ახლა 7 წლის მანძილზე ჩაითვლება. სწორედ ეს გახდა მიზეზი, რომ ენუქიძისა და ჰააგის შემცვლელის მოძიება გახდა საჭირო.
თიბისი აცხადებს, რომ უახლოეს პერიოდში დაიწყება შემცვლელების მოძიება და ცვლილებები 2021 წლის 31 დეკემბრამდე განხორციელდება.
აღსანიშნავია, რომ ნიკოლოზ ენუქიძე 2016 წელს თიბისი ბანკის ჯგუფის პრემიუმ ლისტინგში გადასვლის შემდეგ, დაინიშნა დირექტორთა საბჭოს უფროს დამოუკიდებელ წევრად.
რაც შეეხება ნიკოლას დომინიკ ჰააგს ის 2013 წელს დაინიშნა სს თიბისი ბანკის სამეთვალყურეო საბჭოს წევრად, ხოლო 2016 წლის მაისიდან ის არის თიბისი ბანკის ჯგუფის დირექტორთა საბჭოს დამოუკიდებელი წევრი.
