TI: პანდემიის დროს სასტუმროების მომსახურებაში სახელმწიფომ 152 მლნ ლარი დახარჯა
პანდემიის პერიოდში, 2020 წლის ივნისიდან 2021 წლის 31 დეკემბრის ჩათვლით გამარტივებული სახელმწიფო შესყიდვის გზით 1.7 მლრდ ლარამდე ჯამური ღირებულების 21 000-მდე მსხვილი კონტრაქტი გაფორმდა. შესაბამის კვლევას "საერთაშორისო გამჭვირვალობა" აქვეყნებს.
კვლევის თანახმად, "კოვიდ 19"-ით გამოწვეულმა ხარჯმა გამარტივებულ სახელმწიფო შესყიდვებში დაახლოებით 715 მლნ ლარი შეადგინა. ყველაზე მეტი თანხა - 486 მლნ ლარი ჯანდაცვის სფეროს მომსახურებაზე დაიხარჯა, რაც ძირითადად "კოვიდ პაციენტების" მკურნალობას მოიცავდა.
პანდემიამ მნიშვნელოვნად გაზარდა სასტუმროების მომსახურების შეძენის ხარჯები,
რომელზეც 152 მლნ ლარი დაიხარჯა.
"პანდემიის საწყისს ეტაპზე სასტუმროების დაქირავების პრინციპი კითხვებს აჩენდა, რადგან არ არსებობდა ერთიანი ტარიფი და სასტუმროების შერჩევის კრიტერიუმები. 2020 წლის მარტის ბოლოდან მთავრობამ ერთი ნომრის ღირებულება მაქსიმუმ 100 ლარად განსაზღვრა, ხოლო ვირუსის ფართოდ გავრცელებამ სასტუმროების საკარანტინე სივრცეებად და „კოვიდ სასტუმროებად“ მასიურად გამოყენება გახადა საჭირო",- აცხადებენ ორგანიზაციაში.
კვლევის თანახმად, პანდემიის გავლენა დაეტყო სამედიცინო მოწყობილობების და ფარმაცევტული პროდუქტების შეძენაზე დახარჯულ თანხას, რომლებზეც ჯამში 75 მლნ ლარი დაიხარჯა.
