სებ-ი ₾200 000 ზღვარს აკორექტირებს

სასესხო რეგულაცია 1-ლი სექტემბრიდან კიდევ მკაცრდება, სებ-ის ვიცე-პრეზიდენტის არჩილ მესტვირიშვილის ბრძანებით. დეპოზიტით უზრუნველყოფა მსესხებლის ჯამურ ვალდებულებაში აღარ გაითვალისწინება.

„საქართველოს სამოქალაქო კოდექსის 625-ე მუხლის მე-7 ნაწილის მიზნებისთვის (200 000 ლარიანის ზღვარი), სესხის გაცემის შედეგად ამავე გამსესხებლის მიმართ მსესხებლის ჯამური ვალდებულებების  დათვლისას არ უნდა იქნეს გათვალისწინებული ფულადი სახსრებით უზრუნველყოფილი ვალდებულებები“, - აღნიშნულია ნორმატიულ აქტში.

მარეგულირებელი ფიქრობს, რომ აღნიშნული შეზღუდვით სავალუტო დაკრედიტების გავრცელებულლი პრაქტიკა მოისპობა.

კერძოდ, როცა ამა თუ მსესხებელს შემოსავალი არ ჰყოფნის ₾200 000-იანი ზღვარი რომ გადალახოს და შესაბამისად სავალუტო კრედიტზე მიუწვდეს ხელი. მაგალითად, თუ შემოსავლები მხოლოდ 195 000 ლარამდე სესხის აღების შესაძლებლობას აძლევს, ანუ აკლდება ₾5 000. დღეს მოქმედი რეგულაციის პირობებში გავრცელებული პრაქტიკით, ამ კატეგორიის პოტენციური მსესხებელი დეპოზიტზე ანათავსებს $3 000-ს, რაც ჯამურ ვალდებულებებში აისახება და აიღებს სავალუტო სესხს $/€70 000-ს (200 000 ლარს). ევროში დაკრედიტება დოლართან გაუფასურების პირობებში უფრო მიმზიდველი გახდა (ამ დროისთვის 1 ევრო 1,02 დოლარი ღირს წინა კვირის განმავლობაში კურსი გათანაბრებულიც იყო).

ასევე სებ-ის გადაწყვეტილებით, დასაშვები ხდება სავალუტო დაკრედიტება ₾200 000-მდეც, თუ მსესხებელს სავალუტო დეპოზიტიც ექნება. სებ-ი ამ რეგულაციაში მომხმარებელზე ზრუნვის მოტივს ხედავს. გავრცელებული პრაქტიკით, სავალუტო დეპოზიტარს ვალუტის საჭიროება რომ უჩნდება, უწევს საანაბრე პირობების დარღვევა, ცვლ,ილების ამოქმედების შემდეგ კი დეპოზიტს აღარ მოაკლებს და საჭიროებისამებრ სესხს აიღებს.