საქართველოში 3.8 მლრდ ლარის დეპოზიტებია დაზღვეული

დეპოზიტების დაზღვევის სააგენტო დაზღვეული დეპოზიტების ზღვრის მორიგ ზრდას სამ წელში ვარაუდობს.

როგორც სააგენტოს ხელმძღვანელმა „ბიზნესპარტნიორთან“ განმარტა, ფონდი წინასწარ გაკეთებული გათვლების მიხედვით ვითარდება, მასში აკუმულირებული თანხა კი ამ ეტაპზე 48 მლნ ლარია.

"დღეს ფონდში აკუმულირებულია 48 მლნ ლარი. წლის ბოლომდე ვვარაუდობთ, რომ 10 მლნ დაემატება. ფონდი კარგი ტემპით იზრდება და გათვლებიც რეალობას ემთხვევა. რეალურად 1-ელი ივლისიდან სადაზღვევო დეპოზიტების ზღვარის გასამმაგდა. იმ პირობებით, რომ საბანკო სექტორის შემონატანები მხოლოდ 40%-ით გაიზარდა,“ - განაცხადა ოთარ ძიძიკაშვილმა.

მისივე ინფორმაციით, ამ ეტაპზე დაზღვეული დეპოზიტების მოცულობა 3.8 მლრდ ლარს შეადგენს.

„1-ელი ივლისიდან დეპოზიტების დაზღვევის ზღვარი გაიზარდა 5 000-დან 15 000 ლარამდე. გვქონდა დაზღვეული 2 მლრდ ლარი, თუმცა, მატების შემდეგ დღეს-დღეობით მთლიან საბანკო სისტემაში ვაზღვევთ 3.8 მილიარდ ლარს. შედეგად, ყოველთვიურად, სადაზღვევო ფონდში ბანკების შემონატანები 1,6 მლნ ლარიდან 2,3 მლნ ლარამდე გაიზარდა,“ - განაცხადა ძიძიკაშვილმა.