საქართველოს სტატისტიკის სისტემა რეგიონში ლიდერობს და ევროკავშირის 12 ქვეყანას უსწრებს
საქართველოს სტატისტიკის სისტემა ორგანიზაცია Open Data Watch-ის რეიტინგში 8 პოზიციით დაწინაურდა.
ორგანიზაცია Open Data Watch-მა ღია მონაცემთა აღწერის რიგით მეხუთე ანგარიშის მიხედვით, 2020 წელს, საქართველოს სტატისტიკის სისტემის საერთო შეფასებამ 69 ქულა შეადგინა. ქვეყანამ 39-დან 31-ე ადგილზე გადაინაცვლა.
ანგარიშიდან ირკვევა, რომ საქართველო რეიტინგით უსწრებს ევროკავშირის 12 ქვეყანას. მათ შორის იტალიას, საფრანგეთს, ბელგიას, პორტუგალიას და რუმინეთს. ისტორიაში პირველად, ევროპის საუკეთესო ქვეყნების ოცეულში დასახელდა. ანგარიშის თანახმად, საქართველო ასევე უსწრებს ისეთ განვითარებულ ქვეყნებს, როგორიცაა იაპონია, გაერთიანებული სამეფო, ჩინეთი და ინდონეზია.
ორგანიზაცია Open Data Watch-მა ღია მონაცემთა აღწერის რიგით მეხუთე ანგარიში გამოაქვეყნა. მასში წარმოდგენილია მსოფლიოს სხვადასხვა ქვეყნის ოფიციალური სტატისტიკის სამსახურების შეფასება, სხვადასხვა კრიტერიუმის მიხედვით.
შეფასება მოიცავს ეკონომიკური, სოციალური და დემოგრაფიული სტატისტიკის ძირითად მიმართულებებს, როგორიცაა: ეროვნული ანგარიშები, მოსახლეობა და დემოგრაფია, დასაქმების, უმუშევრობის და ფასების სტატისტიკა. ასევე განათლება და ჯანდაცვა, გენდერული სტატისტიკა, სამართალდარღვევების სტატისტიკა, სიღარიბის მაჩვენებლები, სახელმწიფო ფინანსები, საგარეო ვაჭრობა, საგადასახდელო ბალანსი, სოფლის მეურნეობა, გარემოს დაცვა, ენერგეტიკა და სხვა.
